સંવેદનશીલ સાહિત્યકારના મનોજગતમાં ડોકિયું

સામાજિક નિસબત સાથે લલિત સાહિત્યનું સંતુલન જાળવી સાતત્યથી સર્જન કરતાં હિમાંશી શેલતને પ્રતિષ્ઠિત ‘કુવેમ્પૂ રાષ્ટ્રીય પુરસ્કાર' જાહેર થયો છે ત્યારે આ...

- દીપક દોશી (મુંબઈ)

આજના મોબાઈલયુગમાં સમાજના હાથ પુસ્તકનો સ્પર્શ ગુમાવતા જાય છે, પ્રાદેશિક ભાષાના અસ્તિત્વ સામે મોટું જોખમ ઊભું થયું છે અને ગુજરાતી ભાષાને બચાવવી પડે એવા સમયમાં આપણી ભાષાનાં સુપ્રસિદ્ધ લેખિકા હિમાંશી શેલતને ૨૦૨૪નો કુવેમ્પૂ રાષ્ટ્રીય પુરસ્કાર મળ્યાના સમાચાર હર્ષની લાગણી જન્માવી જાય. આવતા મહિને બેંગલુરુ ખાતે એમને આ પુરસ્કાર એનાયત કરવામાં આવશે.

સુખ્યાત કન્નડ સાહિત્યકાર કુવેમ્પુની સ્મૃતિમાં રચાયેલા કુવેમ્પુ ટ્રસ્ટ દ્વારા ૨૦૧૩થી પ્રતિ વર્ષે ભારતીય ભાષામાં શ્રેષ્ઠ સાહિત્યસર્જન કરનારા સર્જકોને કુવેમ્પુ પુરસ્કારથી સમ્માનિત કરવામાં આવે છે. પુરસ્કારમાં રજત ચંદ્રક અને પ્રશસ્તિપત્ર ઉપરાંત રૂપિયા પાંચ લાખની રોકડ રકમનો સમાવેશ થાય છે. ટ્રસ્ટના અધ્યક્ષ બી.એલ. શંકરની અધ્યક્ષતાવાળી પસંદગી સમિતિ દ્વારા ૭૭ વર્ષી ડૉ. હિમાંશી ઈન્દુલાલ શેલતની પસંદગી કરવામાં આવી છે.

હિમાંશીબહેન ચિત્રલેખાને કહે છેઃ ‘આમ તો હું એવૉર્ડ એનાયત સમારંભમાં જતી નથી... પરંતુ અગ્રહારા કૃષ્ણમૂર્તિએ મને કહ્યું કે પુરસ્કારને અંગત ન ગણો. તમે જે ભાષાની ખેવના કરી એ ગુજરાતી ભાષાને સમ્માન મળે છે... વળી, આવો રાષ્ટ્રીય પુરસ્કાર પ્રથમ વાર ગુજરાતી ભાષાને મળે છે ત્યારે મારે અંગત આગ્રહો મારી ભાષા પર થોપવા ન જોઈએ. મારા કરતાં મારી ભાષાનું મહત્ત્વ વધુ છે એટલે મેં સમારંભમાં જવાનું નક્કી કર્યું છે.’