கணவன்-மனைவிக்கு தொடர்ந்து தீவிர சிகிச்சை: குன்றத்தூரில் 2 குழந்தைகள் சாவில் உருக்கமான தகவல்!

எலி மருந்தை வைத்துவிட்டு ஏ.சி. போட்டு தூங்கியதே காரணம்; 2 பேர் கைது!!

எலிகளை கொல்வதற்கு வைத்த மருந்து 2 குழந்தைகளின் உயிருக்கு எமனாக மாறியது. இச்சம்பவத்தில் கணவன்-மனைவி தொடர்ந்து கவலைக்கிடமாக உள்ளனர். ஏ.சி.போட்டு தூங்கியதால் இந்த விபரீத சம்பவம் நடைபெற்றுள்ளது.

சென்னை குன்றத்தூரில் நடைபெற்ற பரிதாப சம்பவம் பற்றிய விவரம் வருமாறு:குன்றத்தூர் மணஞ்சேரியில் உள்ளதேவேந்திரன்நகரில் தனியாருக்குச் சொந்தமான 2 மாடி குடியிருப்பில் கிரிதரன்(வயது 34) என்பவர் வசித்து வருகிறார்.

இவர் குன்றத்தூரில் உள்ள சிட்டி யூனியன் என்ற தனியார் வங்கியில் மேலாளராக பணியாற்றி வருகிறார். இவரது மனைவி பவித்ரா(வயது30), இவர்களுக்கு விசாலினி (வயது 6) என்ற மகளும், சாய் சுதர்சனம் (வயது 1) என்ற ஆண் குழந்தையும் இருந்தனர். இந்த நிலையில் இவரது வீட்டில் எலி தொல்லை அதிகமாக இருந்தது. எனவே எலிகளைக் கொல்வதற்கு கிரிதரன் கடையில் மருந்து வாங்கி வைத்துள்ளார்.

ஆனால் எலிகள் சாகவில்லை. மேலும் வீட்டில் குழந்தைகள் இருப்பதால் எலி மருந்தில் அவர்களின் கைப்பட்டு உயிருக்கு ஆபத்தாகி விடும் என பயந்தார். இருந்தும் அட்டகாசம் செய்து வரும் எலிகளைக் கட்டுப்படுத்துவதற்கான நடவடிக்கையை மேற்கொண்டார். அதற்காக ஏற்கனவே தான் பணிபுரியும் வங்கிக்கு மருந்து பூச்சிக்கொல்லி தெளித்த நிறுவனத்தை ஆன்லைன் மூலம் தொடர்பு கொண்டு பேசினார்.

அவர்கள் எலிகளைக் கொல்வதற்கு மருந்து மற்றும் ரசாயனப் பொருட்களை வைப்பதாக கூறினார்கள். எனவே அவர்களை அதற்கான பணியில் அமர்த்தினார். இந்நிலையில் நேற்று முன்தினம் இவரது வீட்டிற்கு அந்த நிறுவனத்தைச் சேர்ந்த 2 ஊழியர்கள் வந்தனர்.