એડ્વાન્સ પ્રોપર્ટી ટેક્સ યોજના હેઠળ મ્યુનિ. તિજોરીમાં ૫૨૩ કરોડ ઠલાવાયા

આજે યોજનાનો લાભ લેવાનો છેલ્લો દિવસઃ ઓનલાઈન ટેક્સ ભરનારને નવ ટકા રિબેટ

અમદાવાદ, ગુરુવાર

મ્યુનિ. કોર્પોરેશનમાં ઓક્ટ્રોયની આવક બંધ થયા બાદ પ્રોપર્ટી ટેક્સ જ એકમાત્ર આવકનો સ્રોત રહ્યો છે. તંત્રનાં સામાન્ય પ્રજાલક્ષી સુવિધાઓનાં કામ કહો કે મોટા પ્રોજેક્ટને ગણો, તેના માટે પ્રોપર્ટી ટેક્સની આવક મહત્ત્વનું આર્થિક પરિબળ છે. શહેરના શાસકો પણ આ આવકને વધારવા માટે ચાલુ નાણાકીય વર્ષ ૨૦૨૨-૨૩ના પ્રારંભથી જ પ્રયત્નશીલ છે. પરિણામે તંત્રના ઇતિહાસમાં સર્વપ્રથમ વાર ત્રણ મહિના લાંબી એડ્વાન્સ પ્રોપર્ટી ટેક્સ યોજના જાહેર કરાઈ છે. આ યોજના તંત્રને ફળદાયી પણ નીવડી છે, કેમ કે તેના થકી મ્યુનિ. તિજોરીમાં ગઈ કાલ સુધી રૂ. ૫૨૩ કરોડ જેટલી જંગી રકમ ઠલવાઈ છે.