વેજલપુરના શ્રીનંદનગર ફ્લેટમાં મહિલાની કોહવાયેલી લાશ મળીઃ હત્યાની આશંકા

ડિવોર્સ થયા બાદ મહિલા ફ્લેટમાં એકલી રહેતી હતીઃ ફ્લેટમાંથી દુર્ગંધ આવતાં પાડોશીએ પોલીસને જાણ કરી

અમદાવાદ, શનિવાર

શહેરના વેજલપુર વિસ્તારમાં આવેલા શ્રીનંદનગર ફ્લેટમાં ગઇ કાલે એક મહિલાની કોહવાયેલી હાલતમાં લાશ મળી આવતાં સમગ્ર વિસ્તારમાં ચકચાર મચી ગઇ છે. મહિલાની ઠંડા કલેજે હત્યા કરીને હત્યારો ફરાર થઇ ગયો હોય તેવું લાગી રહ્યું છે. મહિલાનાં મોત મામલે પોલીસે હાલ અકસ્માત મોતનો ગુનો દાખલ કર્યો છે. રહસ્યમય મોતમાં કેટલાંક કારણો એવાં છે કે જે મહિલાની હત્યા કરાઇ હોવા તરફ ઇશારા કરી રહ્યાં છે. વેજલપુર પોલીસ તેમજ ઝોન ૭ની લોકલ ક્રાઇમ બ્રાંચે મહિલાના ભેદી મોત મામલે તપાસનો ધમધમાટ શરૂ કર્યો છે.

વેજલપુર વિસ્તારમાં આવેલા શ્રીનંદનગર ફ્લેટ વિભાગ ૨માં એન/બ્લોકના ફ્લેટ નંબર ૧૦૪માં છેલ્લા ઘણા સમયથી મનીષાબહેન નામની ૪૭ વર્ષની મહિલા એકલી રહે છે. મનીષાબહેનના ઘરમાં છેલ્લા ઘણા દિવસથી તાળું માર્યું હતું અને આસપાસના ફ્લેટના રહીશોને અત્યંત દુર્ગંધ આવવા લાગી હતી. ફ્લેટના રહીશો ભેગા થઇ ગયા હતા અને મનીષાબહેનના ઘરમાંથી દુર્ગંધ આવતી હોવાનું લાગતાં તેમણે તરત જ પોલીસને   જાણ કરી હતી.