શું હવે પાકિસ્તાન કહેશે કે અસલી શિવસેના કોની છે? શિંદેએ ઠાકરે સામે નિશાન સાધ્યું

મહારાષ્ટ્રમાં શિવસેનાના ચૂંટણી ચિહ્ન પર નિર્ણય લેતાં ચૂંટણીપંચે આ વર્ષની શરૂઆતમાં જ ધનુષ અને તીરનું ચિહ્ન શિંદે જૂથને સોંપી દીધું હતું

મુંબઇ, સોમવાર

મહારાષ્ટ્રના મુખ્યપ્રધાન એકનાથ શિંદેએ રવિવારે રાજ્યના પૂર્વ મુખ્યપ્રધાન ઉદ્ધવ ઠાકરે પર નિશાન સાધતાં કહ્યું કે એ દુર્ભાગ્યપૂર્ણ છે કે અસલી શિવસેના કોની છે? એ નક્કી કરવા માટે પાકિસ્તાનના પ્રમાણપત્રની જરૂર છે. શિવસેનાના પ્રમુખ ઉદ્ધવ ઠાકરેએ રવિવારે મહારાષ્ટ્રના જલગાંવમાં આયોજિત એક જનસભામાં કહ્યું હતું કે તેમને લોકો પાસેથી મળી રહેલા સમર્થનને જોઇને પાકિસ્તાન પણ જણાવી દેશે કે અસલી શિવસેના કોની છે, પરંતુ ચૂંટણીપંચ એવું ન કરી શકે, કેમ કે તે ‘મોતિયાથી પીડિત’ છે.