બિપરજોય સંકટઃ જખૌથી ૧૮૦ કિમી દૂર વાવાઝોડું સાંજે છ વાગ્યા પછી ત્રાટકશે

વાવાઝોડું ટકરાશે તે વખતે પ્રતિકલાક ૧૪૦ કિમીની ઝડપ ધરાવતો અતિભારે પવન ફૂંકાશે

અમદાવાદ, ગુરુવાર

સમગ્ર ગુજરાતના લાખો લોકોના શ્વાસ અધ્ધર કરી નાખનારું અતિવિનાશક બિપ૨જોય વાવાઝોડું આજે સાંજના ચાર વાગ્યા પછી ગમે ત્યારે કચ્છના જખૌ બંદર ખાતે ત્રાટકશે તે બાબત નિશ્ચિત બની છે. આ વાવાઝોડું કચ્છની ધરતી પર ભારે વિનાશ સર્જવા માટે ધીમી ગતિએ પણ સતત આગળ વધી રહ્યું છે. સવારના સાડા પાંચ વાગ્યાની સ્થિતિએ તે જખૌ બંદરથી માત્ર ૧૮૦ કિમી જ દૂર છે. દરમિયાન વાવાઝોડા સામે રક્ષણ આપવા ૭૪ હજારથી વધુ લોકોનું સ્થળાંતર કરાયું છે.

અતિવિનાશક બિપરજોય વાવાઝોડું કચ્છની ધરાને ઘમરોળવા માટે આગળ વધી રહ્યું હોઈ તે જખૌ બંદરના કાંઠે સાંજના છથી રાતના આઠ વાગ્યા વચ્ચે ગમે ત્યારે ત્રાટકશે. આ વાવાઝોડું દ્વારકાથી ૨૧૦ કિમી, નલિયાથી ૨૧૦ કિમી, પોરબંદરથી ૨૯૦ કિમી દૂર છે, જ્યારે પાકિસ્તાનના કરાચીથી ૨૭૦ કિમી દૂર છે.