AMCનું જનભાગીદારીવાળું બજેટઃ નાગરિકોના સૂચનના આધારે શહેરનો વિકાસ નક્કી થશે

અમદાવાદીઓ ૨૯ નવેમ્બર સુધીમાં મ્યુનિસિપલ તંત્રને પોતાના વિસ્તારમાં કયાં કામો કરવાં જોઈએ તેનાં સૂચનો મોકલી શકશે

લાખો અમદાવાદીઓની સુખાકારી માટે અમદાવાદ મ્યુનિસિપલ કોર્પોરેશન (એએમસી) સતત પ્રયત્નશીલ અને પ્રતિબદ્ધ છે. એએમસીના સત્તાધીશો દ્વારા શહેરીજનોની સુખાકારી તેમજ વિકાસકાર્યો માટે કરોડો રૂપિયાના પ્રોજેક્ટ હાથ ધરાઈ રહ્યા છે. કેન્દ્ર સરકાર દ્વારા સામાન્ય બજેટ રજૂ કરતાં પહેલાં નાણાં મંત્રાલય દ્વારા નાગરિકોનાં સૂચનો મંગાવવામાં આવે છે. અમદાવાદ મ્યુનિસિપલ કોર્પોરેશન દ્વારા પણ વર્ષ ૨૦૨૫-૨૬ના બજેટમાં નાગરિકોને પોતાના વિસ્તારમાં કઈ કઈ સુવિધાઓ કે વિકાસનાં કામો જોઈએ છે તે અંગેનાં સૂચનો મંગાવવામાં આવ્યાં છે. અમદાવાદીઓ આજથી ૨૯ નવેમ્બર સુધીમાં પોતાનું નામ, મોબાઇલ નંબર અને ઈ-મેઇલ સાથે તંત્રને પોતાનાં સૂચનો amcbudget202526@gmail.​com પર મોકલી શકશે.