દેશનાં અનેક રાજ્યમાં વિચિત્ર હવામાતઃ ક્યાંક વરસાદ તો ક્યાંક હિમવર્ષા

મધ્ય પ્રદેશ, ઉત્તર પ્રદેશ અને રાજસ્થાન સહિતનાં રાજ્યોમાં ઠંડી વધી

દેશનાં અનેક રાજ્યમાં આ દિવસોમાં વિચિત્ર હવામાન જોવા મળી રહ્યું છે. ક્યાંક વરસાદ, ક્યાંક હિમવર્ષા, ક્યાંક ધુમ્મસ તો ક્યાંક ગુલાબી ઠંડી પડી રહી છે. ઉત્તરાખંડ, જમ્મુ-કાશ્મીર અને હિમાચલ પ્રદેશમાં હિમવર્ષાના કારણે ઠંડી વધી રહી છે. તે જ સમયે ઉત્તર ભારતનાં રાજ્યમાં ગાઢ ધુમ્મસના કારણે ઠંડી વધી રહી છે, જ્યારે દક્ષિણનાં રાજ્યમાં ચક્રવાતી તોફાન ફેંગલની અસરના કારણે વરસાદ અને ઠંડી પડી રહી છે, તેનાથી વિપરીત દિલ્હીના લોકો આ વખતે પણ ઠંડીની રાહ જોઈ રહ્યા છે. ડિસેમ્બર મહિનો શરૂ થઈ ગયો છે, પરંતુ હજુ સુધી દિલ્હીમાં ઠંડી નથી. દિવસ દરમિયાન સૂર્યપ્રકાશના કારણે લોકો ભેજ અનુભવી રહ્યા છે.

પહાડોમાં હિમવર્ષાના કારણે મધ્યપ્રદેશ, ઉત્તરપ્રદેશ અને રાજસ્થાનના અનેક જિલ્લામાં ઠંડી વધી છે. મધ્યપ્રદેશનાં દસ, રાજસ્થાનનાં આઠ, ઉત્તર પ્રદેશનાં બે અને છત્તીસગઢનાં બે શહેરમાં પારો ૧૦ ડિગ્રીથી નીચે નોંધાયો હતો. કાશ્મીરના મારવાહ, કિશ્તવાડ અને બદવાનમાં હિમવર્ષા થઈ રહી છે. હિમાચલ પ્રદેશના લાહૌલ સ્પીતિમાં વધતી ઠંડીના કારણે પાણી જામવા લાગ્યું છે.