પ્રેમસંબંધનો લોહિયાળ અંતઃ યુવકને પ્રેમિકાના ભાઈએ જાહેરમાં છરીના આડેધડ ઘા ઝીંકી દીધા

ગઈ કાલે યુવક અને યુવતીને આબુરોડથી પકડ્યાં હતાં

મિટિંગમાં પ્રેમી યુગલનાં લગ્ન કરાવવાની વાત થઈ ગયા બાદ યુવતીના ભાઈનું હિચકારું કૃત્ય

ફિલ્મી સ્ટોરીને પણ ટક્કર મારે તેવી ઘટના શહેરના ખોખરા વિસ્તાર માં મોડી રાતે બની છે. યુવકને પ્રેમ કરવાનું પરિણામ એટલી હદે ખરાબ મળ્યું કે તે હાલ જીવન-મરણ વચ્ચે ઝોલાં ખાઈ રહ્યો છે. યુવક પર મોડી રાતે પ્રેમિકાના ભાઈએ છરીના ઘા ઝીંકીને મોતને ઘાટ ઉતારવાની કોશિશ કરી હતી. પ્રેમી યુગલને એક કરવા માટે બંને પક્ષે લગ્નની વાતચીત ચાલી રહી હતી ત્યારે છળકપટ કરીને યુવકને છરીઓના ઘા ઝીંકી દેવામાં આવ્યા હતા. ઘટનાની જાણ ખોખરા પોલીસને થતાં તેઓ તાત્કાલિક ઘટનાસ્થળે પહોંચી ગયા હતા અને હત્યાની કોશિશનો ગુનો નોંધીને તપાસનો ધમધમાટ શરૂ કર્યો છે.

હાટકેશ્વરમાં આવેલા સૂર્યાનગરમાં રહેતા ચિરાગ પરમારે ખોખરા પોલીસ સ્ટેશનમાં યશ વિનોદ સોલંકી વિરુદ્ધ હત્યાની કોશિશની ફરિયાદ કરી છે. ચિરાગ તેનાં માતા-પિતા અને ભાઈ સાથે સંયુક્ત પરિવારમાં રહે છે અને નોકરી કરીને ગુજરાન ચલાવે છે. ચિરાગના ભાઇ સાહિલ પર છળકપટ કરીને છરીના ઘા ઝીંકવામાં આવ્યા છે.