పసిడికి రెక్కలు!

గత కొన్నిరోజుల నుండి పసిడి పరుగులు తీస్తుంది. ఆర్థిక మాంద్యం బంగారం రేటు చుక్కల్లోకి దూసుకుపోయేలా పసి చేస్తోంది. ప్రతీరోజు పతాక శీర్షికల్లో కొండెక్కుతున్న బంగారు ధరలు గుబులు పెట్టిస్తున్నాయి. గతంలో ఎన్నడూ లేనివిధంగా ఏ రోజుకారోజు కొత్త రికార్డులకు చేరుతోంది.

- రుద్రరాజు శ్రీనివాసరాజు

గత కొన్నిరోజుల నుండి పసిడి పరుగులు తీస్తుంది. ఆర్థిక మాంద్యం బంగారం రేటు చుక్కల్లోకి దూసుకుపోయేలా పసి చేస్తోంది. ప్రతీరోజు పతాక శీర్షికల్లో కొండెక్కుతున్న బంగారు ధరలు గుబులు పెట్టిస్తున్నాయి. గతంలో ఎన్నడూ లేనివిధంగా ఏ రోజుకారోజు కొత్త రికార్డులకు చేరుతోంది.

సరికొత్త రికార్డు సృష్టిస్తున్న బంగారం ప్రస్తుతం రూ. 72 వేల దగ్గర తచ్చాడుతున్నది. ప్రస్తుత బంగారం గమనాన్ని గమనిస్తే.. రూ. లక్ష దిశగా పసిడి పరుగులు పెడుతున్నదనే భయపెట్టే విశ్లేషణలూ మనకు వినవస్తున్నాయి. ఇప్పుడు బంగారం కొనడమంటే గగనమే..అయినా బంగారం కొనుగోలు పరిమాణం తగ్గిందే కానీ పూర్తిగా ఆగిపోలేదు. బంగారం ధర ఇంతగా పెరుగుతూ ఉన్నా ఇంకా దానిపై మక్కువ తగ్గకపోవడానికి గల కారణాలు ఏమిటి? ప్రపంచంలో ప్లాటినం, పెలాడియం లాంటి ఎన్నో విలువైన లోహాలు ఉన్నప్పటికి బంగారానికే ఇంత డిమాండ్ ఉండటానికి గల కారణాలు బంగారం ధర ఎవరు నిర్ణయిస్తారు.అనే అంశాలపై ఈరోజు ప్రత్యేక కథనం.సామాన్యుల నుండి సెలబ్రెటీల వరకూ అందరి జీవితంలో భాగమైన బంగారమంత విలువైన లోహం మరొకటి లేనే లేదు. అందుకే ప్రపంచమంతా బంగారానికి దాసోహం అంటుంది. మన గమనంలో పుత్తడిని తలుచుకోని సందర్భం అంటూ ఏదీ ఉండదు. ధనం లేకున్నా, తులం బంగారం అయినా ఒంటి మీద ఉండాలనేది సగటు మధ్య తరగతి ప్రజల మనోగతం. భారతీయ సంప్రదాయంలో బంగారానికి ఓ ప్రత్యేక స్థానం ఉంది. భారతీయులు బంగారాన్ని లక్ష్మీదేవిగా భావించి, ఎంతో కొంత కొనుగోలు చేస్తారు. ఎంత పేదవాళ్లయినా సరే.. తులమైనా మెడలో మెరుస్తుంటుంది. అప్పుడే పుట్టిన బిడ్డ నుంచి మొదలు ముదసలి వారి వరకు బంగారం ధరించడం తప్పనిసరిగా ఉంటుంది.