അരുൺകുമാർ നമ്പൂതിരി ഒരു പു ചോദിച്ചു അയ്യപ്പൻ ഒരു പൂക്കാലം തന്നെ നൽകി

നിയുക്ത മേൽശാന്തി എസ്. അരുൺകുമാർ നമ്പൂതിരിയുടെ വിശേഷങ്ങൾ

- പി. ജയചന്ദ്രൻ

കൊല്ലം വള്ളിക്കീഴ് പൂമുഖത്തമ്പലത്തിന് വടക്കുവശം "നാരായണീയം'(തോട്ടത്തിൽ മഠം) വീടിന്റെ മുൻഭിത്തിയിൽ ഒറ്റനോട്ടത്തിൽ തന്നെ ആരും കാണത്തക്ക വിധം ആറ്റുകാൽ ഭഗവതിയുടെ സാമാന്യം വലിയൊരു ചിത്രം ഫ്രെയിം ചെയ്തു വച്ചിട്ടുണ്ട്. അതിൽ ആറ്റുകാലമ്മേ ശരണം എന്നുള്ള എഴുത്തിന് മുകളിലായി മറ്റൊരു എഴുത്തുകൂടിയുണ്ട്. സ്ത്രീകളുടെ ശബരിമല എന്ന്. അതേ ചിത്രത്തിന്റെ താഴെ എസ്. അരുൺകുമാർ നമ്പൂതിരി, ആറ്റുകാൽ മേൽശാന്തി 2015-17 എന്നുകൂടി എഴുതിയിരിക്കുന്നത് കാണാം. അതായത് ആ രണ്ടുവർഷം ആറ്റുകാൽ ക്ഷേത്രത്തിൽ നറുക്കുവീണ് മേൽശാന്തിയായത് അരുൺകുമാറായിരുന്നു.

അതിനൊരു പ്രത്യേകതയുണ്ട്. തുടർച്ചയായി രണ്ടുപ്രാവശ്യം നറുക്കെടുപ്പിലൂടെ ഒരാൾ തന്നെ ഒരേ അമ്പലത്തിൽ മേൽശാന്തിയാകുന്നത്സാ ധാരണമല്ല. എന്നാൽ 2015 ലും 2016 ലും അരുൺകുമാറിന് വേണ്ടി ആ സാധാരണ രീതി ഒന്ന് മാറിനിന്നു. രണ്ടുപ്രാവശ്യവും ഈ സാത്വികന്റെ പേരുതന്നെ നറുക്കിൽ വന്നു. അങ്ങനെ തുടർച്ചയായി രണ്ടുവർഷം പുറപ്പെടാ ശാന്തിയായി സ്ത്രീകളുടെ ശബരിമല എന്ന് ഖ്യാതികേട്ട ആറ്റു കാൽ ക്ഷേത്രത്തിൽ വിശ്വരക്ഷകയായ അമ്മയ്ക്ക് പൂജ കഴിക്കുവാനുള്ള അപൂർവ്വ സൗഭാഗ്യം ലഭിച്ച അനുഗൃഹീതനാണ് അരുൺകുമാർ നമ്പൂതിരി.

അതിലുമുണ്ടൊരു പ്രത്യേകത. സാധാരണയായി പ്രൈവറ്റ് അമ്പലങ്ങളിലെ പൂജാരിമാർ മാത്രമാണ് ആറ്റുകാൽ പോലെ സ്വകാര്യ ട്രസ്റ്റിന് കീഴിലുള്ള ക്ഷേത്രങ്ങളിലേക്ക് മേൽശാന്തി നിയമനത്തിനായി അപേക്ഷിക്കാറുള്ളൂ. ദേവസ്വം ബോർഡിലെ ശാന്തിമാർ അപേക്ഷിക്കാറില്ല. എന്നാൽ ജീവിതത്തിലൊരിക്കലെങ്കിലും ആറ്റുകാലമ്മയ്ക്ക് പൂജ കഴിക്കണമെന്ന അദമ്യമായ ആഗ്രഹത്താൽ, ബോർഡിൽ നിന്നും പ്രത്യേകം അനുമതി വാങ്ങി 2015 ൽ അരുൺകുമാർ അപേക്ഷിച്ചു. നറുക്കുവീണു. തുടർന്നുള്ള ഒരു വർഷക്കാലത്തെ അരുൺകുമാറിന്റെ മാതൃതുല്യപരിപാലനത്തിൽ(വിശ്വാസപ്രകാരം തന്ത്രിയാണ് ദേവന്റെയോ ദേവിയുടെയോ പിതാവ്. പൂജാരി മാതാവും) സംതൃപ്തയായിട്ടു തന്നെയായിരിക്കണം അദ്ദേഹത്തിനു തന്നെ 2016 ലും നറുക്ക് വീണത്.

അങ്ങനെ ആറ്റുകാൽ ക്ഷേത്രത്തിൽ മേൽശാതിയാകുന്ന ആദ്യ ദേവസ്വം ബോർഡ് ശാന്തിയായ അരുൺകുമാർ തുടർച്ചയായി രണ്ടുവർഷം നറുക്കെടുപ്പിൽ വിജയിച്ച ആദ്യമേൽശാന്തിയുമായി. ആ അനുഗ്രഹസൂചകമായിട്ടാണ്, മനസ്സിൽ നിറഞ്ഞു നിൽക്കുന്ന അമ്മയുടെ തേജോമയരൂപത്തെ ചിത്രത്തിലേക്കു കൂടി പകർത്തി പ്രതിഷ്ഠിക്കുവാൻ അരുൺകുമാർ തീരുമാനിച്ചത്.