વરસાદમાં સ્કિન એલર્જી

બદલાતી મોસમમાં સ્કિન એલર્જીની સમસ્યાથી જો દૂર રહેવા ઈચ્છો છો તો આ ટિપ્સ તમારા માટે ખૂબ લાભદાયી સાબિત થશે..

24 વર્ષની અંજલિ વર્મા ખૂબ બિનધાસ્ત સ્વભાવની છોકરી છે. તેને હરવુંફરવું, શોપિંગ કરવું અને સુંદર દેખાવું ખૂબ ગમે છે. ગરમીમાં તે એકએકથી ચડિયાતા ડ્રેસિસ ખરીદે છે અને પૂરા મેકઅપમાં બહાર નીકળે છે, છે પરંતુ છેલ્લા થોડાક દિવસથી તેને અળાઈની સમસ્યા થવા લાગી છે.

ગત રવિવારે જ્યારે તે તેની સાહેલીની બર્થડે પાર્ટીમાં પહોંચી ત્યારે બધા તેને જોઈને ચોંકી ગયા હતા. સ્ટાઈલિશ વનપીસ ડ્રેસ અને ખુલ્લા વાળમાં તે ખૂબ સુંદર દેખાતી હતી, પરંતુ સાંજ થતાંથતાં તેને પીઠ અને ગળાના ભાગ પર ખંજવાળ શરૂ થઈ ગઈ. પછી ખંજવાળ વધતી ગઈ અને નાનાનાના લાલ દાણા નીકળી આવ્યા. તે જોઈને તેની સાહેલીએ તેને એલર્જીની દવા આપી અને નહાવા માટે મોકલી દીધી. સ્નાન કરી લીધા પછી તેને તેના કોટનના કપડાં પહેરવા આપ્યા, સાથે પ્રભાવિત ભાગ પર એલોવેરા જેલ પણ લગાવી આપી. ધીરેધીરે તેના પ્રોબ્લેમમાં રાહત થઈ ગઈ.

હકીકતમાં ગરમીના દિવસોમાં સ્કિન સંબંધિત રોગ જેમ કે અળાઈ વગેરેની સમસ્યા વધી જાય છે. બેદરકારી રાખતા આ સમસ્યા ગંભીર થઈ શકે છે. સ્કિન પર લાલ રંગના દાણા અને તેમાં ખંજવાળ આવવી સામાન્ય રીતે અળાઈના લક્ષણ છે. આ સ્થિતિમાં શરીર પર પરસેવાની જગ્યાએ નાનાનાના લાલ ચકામા પડી જાય છે અને તેમાં ખંજવાળ આવવા લાગે છે.

આ સમસ્યા વધારે ગરમી અથવા ટાઈટ કપડાં પહેરવાથી થાય છે. તેનાથી બચવા માટે શક્ય હોય ત્યાં સુધી તાપથી બચવું જોઈએ. જો બહાર જવું પડે તેમ હોય તો કેપ પહેરીને જાઓ, સાથે છત્રી લઈ જાઓ તેમજ શરીરના ખુલ્લા ભાગ પર સનસ્ક્રીન લગાવો. પોલિએસ્ટર અથવા નાયલોનના કપડાના બદલે સુતરાઉ, ઢીલા અને આરામદાયક કપડાં પહેરો.

તમારી સ્કિન કોઈ ખાસ વસ્તુ પ્રત્યે સંવેદનશીલ હોય તો તે સ્થિતિમાં સ્કિન પર તે વસ્તુની અસરથી દાણા, ખીલ, લાલ ચકામા કે ફોલ્લી નીકળી શકે છે. સ્કિન એલર્જીના આમ તો ઘણા બધા કારણ હોઈ શકે છે :

> કેટલાક લોકોને ખાસ પ્રકારના ખોરાકથી એલર્જી થાય છે. કોઈ વસ્તુ ખાવા માત્રથી તેમને ખંજવાળની સમસ્યા થઈ શકે છે.

> કેટલાક લોકોને કોઈ દવાની સાઈડ ઈફેક્ટથી ખંજવાળ અથવા એલર્જી થઈ શકે છે.