കൊളസ്ട്രോൾ പരിഹരിക്കാൻ ആയുർവേദം

ബേക്കറി പലഹാരങ്ങളുടെ അമിതോപയോഗം മേദസിനുള്ള ഏറ്റവും പ്രധാനപ്പെട്ട കാരണമാണ്. നാരുള്ള ഭക്ഷണങ്ങളുടെ അഭാവം കൊളസ്ട്രോൾ വർധിപ്പിക്കും.

തെറ്റായ ജീവിതശൈലിയിലൂടെ ക്ഷണിച്ചുവരുത്തുന്ന രോഗമാണ് കൊളസ്ട്രോൾ. പഴയകാലത്തുള്ളവർ കഴിച്ചിരുന്ന ഭക്ഷണത്തിന്റെ അളവിലും കുറവാണ് പുതുതലമുറയുടെ ഭക്ഷണക്രമമെന്ന് പറഞ്ഞിട്ടു കാര്യമില്ല. അവരുടെ ജീവിതശൈലി ശരീരം അനങ്ങിയുള്ളതായതിനാൽ അമിതമായി അടിഞ്ഞുകൂടുന്ന കൊഴുപ്പ് ഉപയോഗിക്കപ്പെട്ടിരുന്നു. എന്നാൽ അലസത നിറഞ്ഞ ജീവിതരീതിയാണ് ഇന്നത്തെ തലമുറയുടേത്. അപ്പോൾ അവർക്ക് അതനുസരിച്ചുള്ള ഭക്ഷണം മതി. ഹിതമായ ആഹാരം മിതമായി കഴിച്ചാൽ ശരീരത്തിൽ കൊഴുപ്പ് അമിതമായി അടിഞ്ഞുകൂടുന്നത് കുറയ്ക്കാം. നാം കഴിക്കുന്ന ആഹാരം ചെയ്യുന്ന പ്രവൃത്തികൾക്കനുസരിച്ചായിരിക്കണം. കഠിനാധ്വാനം ചെയ്യുന്ന ഒരാൾ അയാളുടെ ദഹിക്കാനുള്ള കഴിവനുസരിച്ച് വേണം ആഹാരം കഴിക്കാൻ. അദ്ധ്വാനം കുറവുള്ള ജോലി ചെയ്യുന്നവർ അതനുസരിച്ച് ആഹാരം കുറയ്ക്കണം. വയറിൽ പകുതി ഭാഗം നിറയുന്ന രീതിയിൽ മാത്രം ഭക്ഷണം കഴിക്കാവൂ. വേദകാലം മുതൽ പറയുന്നത് പ്രധാന ഭക്ഷണം ഒരു ദിവസം രണ്ടു തവണ മതിയെന്നാണ്. പ്രഭാതഭക്ഷണവും ഉച്ചഭക്ഷണവും പ്രധാനമായെടുക്കണം. വൈകുന്നേരം കുറഞ്ഞ അളവിലുള്ള ആഹാരമാണ് നല്ലത്. മാംസഭക്ഷണം നിയന്ത്രിക്കുക. ഇടവേളകളിൽ ലഘുഭക്ഷണം കഴിക്കാം. രോഗം വരാതിരിക്കാനും രോഗം വന്നാൽ നിയന്ത്രിക്കാനും ഇത് സഹായിക്കും.