വഴിത്തിരിവായത് ഉപ്പും മുളകും

വഴിത്തിരിവ് ബിജു സോപാനം

- ഉമ ആനന്ദ്

സിനിമയായിരുന്നു മോഹിച്ചതെങ്കിലും എത്തിപ്പെട്ടത് നാടകത്തിൽ. പിന്നീട് രണ്ട് പതിറ്റാണ്ട്   കാലം നാടകം തന്നെയായിരുന്നു ജീവിതം. തികച്ചും അപ്രതീക്ഷിതമായാണ് ഒരു ടെലിവിഷൻ പരമ്പരയിൽ അവസരം ലഭിച്ചത്. അതാകട്ടെ സർവ്വകാല റെക്കോർഡ് സൃഷ്ടിച്ചുകൊണ്ട് ജൈത്രയാത്ര തുടരുകയാണ്.

ബോബനും മോളിയും പോലെ മലയാളി പ്രേക്ഷകർക്ക് അത്രമേൽ പ്രിയങ്കരരായ കഥാപാത്രങ്ങളായി മാറിയിരിക്കുകയാണ് "ഉപ്പും മുളകും' എന്ന പരമ്പരയിലെ ബാലുവും നീലുവും. ബാലു എന്ന കഥാപാത്രത്തെ അനായാസേന അവതരിപ്പിക്കുന്ന ബിജു സോപാനം തന്റെ ജീവിതത്തിലെ വഴിത്തിരിവുകൾ പങ്കുവയ്ക്കുന്നു.

“ഞാൻ ജനിച്ചതും വളർന്നതും പഠിച്ചതുമെല്ലാം ശാസ്തമനയിലാണ്. അച്ഛൻ മാധവൻ തമ്പി, അമ്മ വസന്ത കുമാരിയമ്മ. ഒരു സഹോദരനും സഹോദരിയും ഉണ്ട്. സ്കൂൾ പഠനകാലം മുതലേ മിമിക്രിയിലും മറ്റ് കലാപരിപാടികളിലും സജീവമായിരുന്നു. അന്ന് മനസ്സിൽ നിറഞ്ഞു നിന്നിരുന്നത് സിനിമയായിരുന്നു. എങ്ങനെയെങ്കിലും സിനിമയിൽ അഭിനയിക്കണം. അടുത്ത് ഷൂട്ടിംഗ് നടക്കുന്നുണ്ടെങ്കിൽ കാണാൻ പോകും. അവസാനം സിനിമയല്ലാതെ മറ്റൊന്നും മനസ്സിലേക്ക് കടന്നുവരാത്ത അവസ്ഥയിലെത്തി.