തിരിച്ചറിയപ്പെടാത്ത ചെന്നിത്തല

പാദമുദ്ര

- സജിൽ ശ്രീധർ

രമേശ് ചെന്നിത്തല എന്ന നേതാവിനെ രമേശ് ചെന്നിത്തല സ്ഥാനത്തും അസ്ഥാനത്തും ആക്രമിക്കാൻ മത്സരിക്കുന്നവരുടെ നാടായി കേരളം മാറിയിരിക്കുന്നു. സമൂഹമാധ്യമങ്ങളാണ് അദ്ദേഹത്തെ ഇകഴ്ത്താനായി ഇക്കൂട്ടർ സ്വീകരിച്ചിരിക്കുന്ന വേദി. വാസ്തവത്തിൽ കേരളീയ സമൂഹത്തോട് എന്ത് തെറ്റാണ് അദ്ദേഹം ചെയ്തിട്ടുളളത്? അദ്ദേഹത്തിനെതിരെ ഏതെങ്കിലും തരത്തിൽ ഒരു അഴിമതി ആരോപണം രാഷ്ട്രീയ എതിരാളികൾ പോലും ഇന്നേവരെ ഉന്നയിച്ചിട്ടില്ല. പീഡനകേസുകൾ പൊതുപ്രവർത്തകർ അലങ്കാരമായി കൊണ്ടുനടക്കുന്ന കേരളത്തിൽ ചെന്നിത്തലയ്ക്കെതിരെ അത്തരം ഒരു പരാതിയുമായി ആരും രംഗത്ത് വന്നിട്ടില്ല. രണ്ട് തവണ മന്ത്രിയായിരുന്നപ്പോൾ ഭരണനൈപുണ്യമില്ലാത്ത ഭരണാധികാരി എന്ന് ആരും വിശേഷിപ്പിച്ചിട്ടില്ല. കെ.പി.സി.സി. പ്രസിഡണ്ട് എന്ന നിലയിലും എ.ഐ.സി.സി. സെക്രട്ടറി എന്ന നിലയിലും അദ്ദേഹത്തിന്റെ സംഘടനാ പാടവം ആരും ചോദ്യം ചെയ്തിട്ടില്ലെന്ന് മാത്രമല്ല ഏറ്റവും കുറഞ്ഞ പ്രായത്തിൽ കോൺഗ്രസ് പ്രവർത്തക സമിതി സ്ഥാനം അലങ്കരിച്ചയാളാണ് അദ്ദേഹം. ചെന്നിത്തലയുടെ സംഘടനാ പാടവത്തിന് കോൺഗ്രസിന്റെ പരമോന്നത നേതൃത്വം നൽകിയ അംഗീകാരം കൂടിയാണ് ഈ സ്ഥാനലബ്ധി.