നിർമ്മാണം പുതിയ വഴിത്തിരിവ്

ഒരു പോലീസുകാരൻ വിളിച്ചപ്പോൾ കൂടെ നാലഞ്ചു കൂട്ടുകാരെയും കൂട്ടിയാണ് സ്റ്റേഷനിലേക്ക് പോയത്. എന്തോ നല്ല കാര്യത്തിനാണെന്ന് വിചാരിച്ച് പോയ എന്നെ നോക്കി പറഞ്ഞത് നിന്റെ പേരിൽ ആറു കേസുണ്ട്. നീയാണ് ഒന്നാം പ്രതിയെന്നാണ്. കൂടെ വന്നവരും പെട്ടു. ഒന്നുമറിയാത്ത അവരും പ്രതികളായി. ദൂരെ പോയി ഉന്നത വിദ്യാഭ്യാസം നേടണമെന്ന് വിചാരിച്ചവരുടെ ഉപരിപഠനം മുടങ്ങി. ഈ പ്രശ്നങ്ങൾകൊണ്ടുതന്നെ മാർക്കുണ്ടായിട്ടും ഡിഗ്രിക്ക് അഡ്മിഷൻ ലഭിച്ചില്ല. ടിനി ടോമിന്റെ വഴിത്തിരിവുകൾ..

- ഉമ ആനന്ദ്

പണത്തിന്റെയും പ്രശസ്തിയുടെയും കാര്യമെടുത്താൽ കണ്ണഞ്ചിപ്പിക്കുന്ന മേഖലയാണ് സിനിമാ ലോകമെന്ന് പറയുന്നതിൽ അതിശയോക്തിയുണ്ടെന്ന് തോന്നുന്നില്ല. അതുകൊണ്ടു തന്നെ സിനിമയിലെത്തിപ്പെടുക എന്നത് ഏതൊരു കലാകാരന്റെയും സ്വപ്നമായിരിക്കും. സിനിമയിലെത്തിയാൽ വന്ന വഴി മറക്കുന്നവരാണ് ഭൂരിപക്ഷവും. എന്നാൽ സിനിമാരംഗത്ത് നിലയുറപ്പിച്ചിട്ടും സമയം കിട്ടുമ്പോഴൊക്കെ മിമിക്രി അവതരിപ്പിക്കുകയും അതിൽ അഭിമാനിക്കുകയും ചെയ്യുന്ന ഒരു കലാകാരനുണ്ട് - ആമുഖം ആവശ്യമില്ലാത്ത ടിനി ടോം.

ചലച്ചിത്ര കലാകാരന്മാരുടെ സംഘടനയായ അമ്മയിലെ അംഗം കൂടിയായ ടിനി ടോം.

പിന്നിട്ട വഴികളും വഴിത്തിരിവുകളും ഓർത്തെടുക്കുന്നു.

“ഞങ്ങളുടെ തറവാട് പുത്തൻവേലി കരയാണെങ്കിലും പഠിച്ചതും വളർന്നതും ഇപ്പോൾ ജീവിക്കുന്നതും എറണാകുളത്തു തന്നെ. അച്ഛൻ ടോമി അമ്മ ആനി. അച്ഛന് എച്ച്.എം.ടി.യിലായിരുന്നു ജോലി. എനിക്കൊരു സഹോദരിയുമുണ്ട്. മിമിക്രിയും മോണോ ആക്റ്റുമൊക്കെ എന്റെ രക്തത്തിൽ അലിഞ്ഞു ചേർന്നിരുന്നു. വളരെ കുഞ്ഞു പ്രായത്തിലേ തറവാട്ടിൽ എല്ലാവരും ഒത്തു കൂടുമ്പോൾ അങ്കിളുമാർ നടക്കുന്ന പോലെയും സംസാരിക്കുന്ന പോലെയുമൊക്കെ ഞാൻ അനുകരിച്ചിരുന്നു. അന്ന് മിമിക്രിയും മോണോ ആക്ടും ഇത് പ്രചാരത്തിലില്ലായിരുന്നതു കൊണ്ടുതന്നെ വീട്ടുകാർ എന്റെ പ്രകടനം കണ്ട് എനിക്കെന്തോ രോഗമാണെന്നാണ് കരുതിയിരുന്നത്. അച്ഛന്റെ സഹോദരിമാർ കലാകാരികളായിരുന്നു. പാട്ടിലും ഡാൻസിലും കഴിവ് തെളിയിച്ചവർ. അമ്മവീട്ടിലും കലയുടെ പശ്ചാത്തലമുണ്ട്. അമ്മയുടെ വീട്ടിൽ നിന്നാണ് അമ്മയുടെ ബന്ധുമായ ബേണി ഇഗ്നേഷ്യസ് (സംഗീത സംവിധായകൻ) പഠിച്ചിരുന്നത്.