ജൂനിയർ ചങ്ങമ്പുഴ

വഴിത്തിരിവ് - ചങ്ങമ്പുഴ പ്രഫുല്ലചന്ദ്രൻ വിവിധ മേഖലകളിൽ ശ്രദ്ധേയരായവർ തങ്ങളുടെ ജീവിതത്തിൽ വഴിത്തിരിവായ സന്ദർഭങ്ങൾ പങ്ക് വയ്ക്കുന്നു.

- ഉമ ആനന്ദ്

പ്രശസ്തരുടെ കു ടുംബത്തിൽ ജനിക്കുന്നതിൽ ഗുണവും ദോഷവുമുണ്ട്.

പൊതുവേദികളിലും പൊതു ഇടങ്ങളിലും ലഭിക്കുന്ന സ്വീകാര്യതയും സ്നേഹാദരങ്ങളുമാണ് പ്രഥമവും പ്രധാനവുമായ ഗുണം. അതേസമയം സ്വകാര്യത നഷ്ടപ്പെടുമെന്നതാണ് പ്രധാന ദോഷം. തന്നെയുമല്ല വാക്കിലും പ്രവൃത്തിയിലും ജാഗ്രത പാലിക്കേണ്ടതുമുണ്ട്. മലയാളത്തിന്റെയും മലയാളിയുടെയും എക്കാലത്തേയും രോമാഞ്ചമായ മഹാകവി ചങ്ങമ്പുഴയുടെ സഹോദര പുത്രനായ ചങ്ങമ്പുഴ പ്രഫുല്ല ചന്ദ്രൻ താൻ പിന്നിട്ട ജീവിതത്തിന്റെ ഏടുകൾ മറിക്കുന്നു.

“ഇങ്ങനെ തന്നെയാണ് എന്നെപ്പറ്റി പറഞ്ഞുതുടങ്ങേണ്ടതെന്ന് തോന്നുന്നു.

മഹാകവി ചങ്ങമ്പുഴയുടെ അനുജൻ ചങ്ങമ്പുഴ പ്രഭാകരന്റെ മകൻ എന്നൊരു മേൽവിലാസത്തിൽ ഞാൻ സാഹിത്യത്തിൽ ഒരു കൈ നോക്കുമെന്ന് സ്വപ്നത്തിൽ പോലും കണ്ടതല്ല. പിതൃതുല്യമായ സ്നേഹ ബഹുമാനത്തോടെ തന്റെ ചേട്ടനെ പിൻതുടരുകയും പരിചരിക്കുകയും ചെയ്ത ഒരനുജന്റെ വായ്മൊഴിത്തുണ്ടുകളും, മധുര മനോഹരമായി ആലപിക്കുന്ന ചങ്ങപുഴക്കവിതകളും എന്റെ മനസ്സിൽ മൂടിക്കിടന്നത് വിധിവശാൽ മുളപൊട്ടിയതാവാം എന്തായാലും ചിലതെല്ലാം ഞാനെഴുതി. ബാല കവിതകളിൽ നിന്നാണ് തുടക്കം.

1970 മുതൽ 2000 വരെയുള്ള കാലഘട്ടത്തിൽ ബാലസാഹിത്യത്തിലും, കവിതകളിലും നിത്യസാന്നിദ്ധ്യമായിരുന്ന എന്റെ ഭാര്യാ പിതാവ്, കവി മാസ്റ്റർ എന്ന് ഞാൻ അദ്ദേഹം കേൾക്കാതെ വിശേഷിപ്പിക്കാറുള്ള പരേതനായ നീലീശ്വരം രാമൻകുഞ്ഞിയായിരുന്നു ഞാനെന്ന കുഴിമടിയനെ സാമദാനത്തിലൂടെ പേനയെടുപ്പിച്ചത്.

അതിനും ഏറെ മുമ്പ് ഇടപ്പള്ളിയിൽ ഹൈസ്കൂൾ കാലം വരെ പഠിച്ചപ്പോഴെല്ലാം സാഹിത്യ മൽസരങ്ങൾക്ക് ഒരു നിത്യ സാന്നിദ്ധ്യമായിരുന്നു ഞാൻ.