സവിശേഷതകൾ നിറഞ്ഞ ഇളനീർ

ഫ്രഷായിട്ടുള്ള ഇളനീർ വെട്ടിയ ഉടൻ തന്നെ കുടിക്കുന്നതാണ് നല്ലത്. ഫ്രിഡ്ജിൽ വയ്ക്കുന്നുവെങ്കിൽ വച്ച് ഇരുപത്തിനാല് മണിക്കൂറിനുള്ളിൽ കുടിക്കേണ്ടതാണ്

- എ.കെ

ആരോഗ്യത്തോടെ ജീവിക്കാൻ വേണ്ടി പ്രകൃതി വരദാനമായി നൽകിയ നിധികളിലൊന്നാണ് ഇളനീർ. ദാഹം ശമിപ്പിക്കുന്ന ദ്രാവകം മാത്രമല്ലാതെ ശരീരത്തിന് അളവറ്റ നന്മയേകുന്ന പാനീയവും കൂടിയാണ് ഇളനീർ. പഴച്ചാറുകൾ, ശീതളപാനീയങ്ങൾ എന്നിവയേക്കാൾ പ്രകൃതിയിൽ നിന്നും ലഭിക്കുന്ന ഇളനീരിൽ കുറഞ്ഞതോതിൽ മാത്രമേ പഞ്ചസാരയും കലോറിയും ഉള്ളൂ. അതുകൊണ്ട് കുട്ടികൾ മുതൽ മുതിർന്നവർ വരെ എല്ലാ പ്രായക്കാർക്കും കുടിക്കാവുന്ന ആരോഗ്യ പാനീയമാണ് ഇളനീർ.

നമ്മുടെ ശരീരത്തിന് വളരെയധികം അത്യാന്താപേക്ഷിതമായിട്ടുള്ള വിറ്റാമിനുകൾ, ധാതു ക്കൾ, ഇലക്ട്രോലൈറ്റുകൾ എന്നിവ സമൃദ്ധമായി ഇളനീരിൽ അടങ്ങിയിരിക്കുന്നു. പ്രത്യേകിച്ച് വിറ്റാമിൻ സി, പ്രോട്ടീൻ, കാത്സ്യം, ഫോസ്ഫറസ്, പൊട്ടാസ്യം കരോട്ടിനോയിഡുകൾ, അമിനോ ആസിഡുകൾ എന്നിവയൊക്കെ അധിക അളവിൽ ഇളനീരിലുണ്ട്. ഇളനീരിൽ പ്രകൃതിദത്തമായിത്തന്നെ ശുദ്ധീകരണ ഘടകങ്ങളുമുണ്ട്. നമ്മുടെ ശരീരത്തിലുള്ള ധാതുക്കളെ ശുദ്ധീകരിക്കയാൽ ഇത് വൃക്കയിലെ കല്ലുകളെ (Kidney stone) അകറ്റുവാനും കല്ലുകൾ ഉണ്ടാവാതിരിക്കാനും സഹായിക്കുന്നു.