വീടിനു നൽകാം പുത്തൻ സ്പീഡ്

ഓണാഘോഷം കഴിഞ്ഞു ജോലിക്കു പോകാനായി സ്പീഡുള്ള വീടൊരുക്കാം

- വിവരങ്ങൾക്കു കടപ്പാട് സോണിയ ലിജേഷ്, സിഇഒ, ക്രിയേറ്റീവ് ഇന്റീരിയോ, കൊടകര, തൃശൂർ

ഓണവും ആഘോഷവും പൊടിപൊടിച്ചപ്പോൾ വീടാകെ അലങ്കോലമായിട്ടുണ്ടാകും. കുറച്ചു ദിവസത്തെ ലീവ് "ദാ...'ന്നങ്ങു പോകും. മക്കൾ സ്കൂളിലേക്കും അച്ഛനും അമ്മയും ജോലിക്കും തിരക്കിട്ടോടുമ്പോൾ, കൂടെ നിൽക്കുന്ന ആക്ടീവ് മുഖം വീടിനു തിരിച്ചുനൽകാൻ ഒട്ടും വൈകേണ്ട.

അതിഥികൾ വരുമ്പോൾ കൂടുതൽ സൗകര്യവും ഭംഗിയും തോന്നാനായി ഫർണിച്ചറുകളുടെ പൊസിഷൻ മാറ്റിയിട്ടുണ്ടാകും. ലിവിങ് ഏരിയയിലെ യൂട്ടിലിറ്റി സ്പേസ് കുറയ്ക്കുന്ന തരത്തിലാണ് ആ മാറ്റമെങ്കിൽ ഫർണിച്ചറുകളുടെ അറേഞ്ച്മെന്റ് പഴയപടി തന്നെയാക്കുക.

സോഫയും മറ്റും വാക്വം ക്ലീനർ ഉപയോഗിച്ചു വൃത്തിയാക്കാം. തുണിയോ റെക്സിനോ കൊണ്ടുള്ള സോഫ ഷാംപൂ കലക്കിയ വെള്ളം ഉപയോഗിച്ച് ക്ലീൻ ചെയ്യണം. ലെതർ ഉത്പന്നങ്ങൾ നന്നായി ബ്രഷ് ചെയ്ത ശേഷം സോപ്പുവെള്ളത്തിൽ മുക്കി പിഴിഞ്ഞ തുണി കൊണ്ടു തുടയ്ക്കാം. കറയോ മറ്റോ വീണിട്ടുണ്ടെങ്കിൽ കോൺഫ്ലോറോ പൗഡറോ ഇട്ട ശേഷം തുണി കൊണ്ടു തുടച്ചു ക്ലീനാക്കാം.