കനിയിൻ കനി നവനി

റൈഫിൾ ക്ലബ്ബ് എന്ന സിനിമയിലെ ഗന്ധർവഗാനം എന്ന പാട്ടിലെ നൃത്തരംഗത്തിലൂടെ ആസ്വാദകരുടെ മനം കവർന്ന മിടുക്കി

- രാഖി റാസ്

മനസ്സിൽ വീഞ്ഞിന്റെ ലഹരി നിറയ്ക്കുന്നൊരു പാട്ട്. സ്വർണ മത്സ്യങ്ങളെപ്പോലെ നൃത്തം ചെയ്യുന്ന പയ്യനും പെൺകുട്ടിയും. റൈഫിൾ ക്ലബ്ബ് എന്ന സിനിമയിലെ "ഗന്ധർവഗാനം' എന്ന പാട്ടിന് ഇത്രയേറെ മധുരം പകർന്നവരിലൊരാൾ ആ രംഗത്തു നൃത്തം ചെയ്ത നവനി ദേവാനന്ദ് എന്ന സുന്ദരിക്കുട്ടിയാണ്.

എംബിബിഎസിന് പഠിക്കുന്ന ഞാൻ ചെന്നൈയിൽ നിന്ന് അവധിയെടുത്ത് അമ്മയുടെ കസിന്റെ കല്യാണ നിശ്ചയത്തിൽ പങ്കെടുക്കാൻ നാട്ടിലെത്തി. ആ സമയത്താണ് ഇൻസ്റ്റഗ്രാമിലെ ഡാൻസ് റീൽസ് കണ്ട് റൈഫിൾ ക്ലബ്ബിന്റെ കാസ്റ്റിങ് ഡയറക്ടറുടെ വിളി. നൃത്തം ചെയ്യേണ്ട കഥാപാത്രമാണ്. ഡാൻസറായ റംസാനാണ് പെയർ എന്നു കൂടി കേട്ടതോടെ പിന്നൊന്നും ചിന്തിച്ചില്ല.

തുടക്കം മൂന്നാം വയസ്സിൽ

എന്റെ അമ്മ ഹേമ എൻജിനീയറും ഇന്റീരിയർ ഡിസൈന റും നർത്തകിയുമാണ്. അച്ഛൻ ഡോ.അനു ദേവാനന്ദ് ഓർത്തോപീഡിക് സർജനും ഗായകനും. എനിക്ക് മൂന്നു വയസ്സുള്ളപ്പോൾ അമ്മ ഇന്റീരിയർ ഡിസൈനിങ് പഠിപ്പിക്കുന്ന സ്ഥാപനത്തിൽ കുട്ടികളുടെ സൗന്ദര്യ മത്സരം നടന്നു. അതിൽ "ടൈറ്റിൽ വിന്നർ ആയിരുന്നു.