બધા મનુષ્ય મારી પ્રજા છે...જગતના નાથનું વચન છે!

ઉત્સવના દિવસો નજીક છે. રથયાત્રા પહેલાં મેદાનમાં ફૂટબોલ ઊછળવા લાગે, નાનાં ભૂલકાંઓથી મોટાં મંદિરો રથ બનાવવા અને શણગારવામાં વ્યસ્ત થઈ જાય. નવી નવલકથા, નવું નાટક, શારદીય સાહિત્ય અને દુર્ગાપૂજા માટે મૂર્તિઓ ઘડવાનું કાર્ય આરંભ થાય. વરસાદ અને સર્જનનો કુદરતી મેળ જામી જાય. મહેશ-શ્રીરામપુર, ઇસ્કોન-માયાપુર સાદગી સાથે રથયાત્રા પર્વ ઊજવવાનું જાહેર કરી ચૂક્યા છે.

- મુકેશ ઠક્કર

લોકો જયારે રથના દોરડા ખેંચતાં હોય ત્યારે અનોખો ઉત્સાહ હોય છે. ઉત્સવ બધું ભૂલાવીને સમાજમાં સમરસતા લાવે છે. રથનાં પૈડાં ખેંચાય, ઘંટનાદ અને શંખનાદ સાથે પૂજાપર્વનું આગમન થઈ જાય. મેળા ભરાય, ધૂમ ખરીદી થાય. રથયાત્રા એક સંદેશ છે, ઈશ્વરનો સંકેત છે, કોઈ પણ કાર્ય પૂર્ણ ન થાય ત્યાં સુધી ધીરજ રાખવી જોઈએ. અધીરાઈ સર્જનને અપૂર્ણ રાખે છે!