ആൺകരുത്താഘോഷത്തിന് പിന്നിലെ പെൺഭാവന

എസ്യുവി കോൺസപ്റ്റിനെ മനോഹരമായി രാം കൃപ നിർവചിച്ചു എന്നു വേണം പറയാൻ

മൂടൽ മഞ്ഞു നിറഞ്ഞ കുന്നുകൾ. ഇരുണ്ട പാറക്കെട്ടുകൾ. പച്ചപ്പ് നിറഞ്ഞ പുൽമേടുകൾ. താഴ്വാരങ്ങളുടെ തടസ്സമില്ലാത്ത 360 ഡിഗ്രി കാഴ്ച. ഇടുക്കിയിലെ ഉറുമ്പിക്കര മലനിരകളിലേക്കുള്ള യാത്രക്കാർക്കായി കരുതിയിരിക്കുന്നത് ഓരോ ചുവടിലും സാഹസികത. മഹീന്ദ്ര ജീപ്പുകൾ കരുത്തു തെളിയിച്ച കാട്ടുവഴി മാത്രമാണ് ഉറു മ്പിക്കരയിലെത്താനുള്ള ഏക മാർഗം. മലനിരകളിലൂടെയുള്ള കല്ലുവഴിയേ ഥാർ മുരണ്ടു കുതിച്ചു. കാട്ടുചോലകളിലെ ഉരുളൻ കല്ലുകളെ ഞെരിച്ച മർത്തി, ചാഞ്ഞും ചരിഞ്ഞും കല്ലുവഴികളെ തോൽപ്പിച്ച് ഥാർ മുന്നോട്ട്. മുകളിലേക്കു പോകാൻ ശ്രമിക്കുന്ന ഥാറിനെ താഴേക്കു വലിച്ചിടാൻ ശ്രമിക്കുന്ന വഴി. പച്ചപ്പിനിടയിലൂടെ കരിവീരൻ തോൽക്കും വിധം ഥാറും മുന്നോട്ടു കുതിച്ചു. ആൺ കരുത്താഘോഷിക്കുന്നതിനു പിന്നിൽ ഒരു പെൺഭാവനയുണ്ട്. പുരുഷന്മാർ ഭൂരിപക്ഷം കൈയ്യാളിയ ഇന്ത്യൻ വാഹന വിപണിയിൽ പതിറ്റാണ്ടു കാലം മുന്നേ കാലുറപ്പിച്ച വനിത.