സ്വാദേറുന്നതിനൊപ്പം വരുമാനം ക്വിക്ക് ബിരിയാണി പായ്ക്കറ്റുകൾ

ഒറ്റയ്ക്കോ കൂട്ടായോ നടത്താവുന്ന സംരംഭങ്ങളിലൂടെ മികച്ച വരുമാനം നേടാനുള്ള സാധ്യതകൾ പരിചയപ്പെടാം.

- ടി.എസ്. ചന്ദ്രൻ

വളരെ പെട്ടെന്നു ബിരിയാണി പാകം ചെയ്തു കഴിക്കാൻ സഹായിക്കുന്ന റെഡി ടു കുക്ക് ബിരിയാണി പായ്ക്കറ്റുകൾക്കു വിപണിയിൽ വലിയ സാധ്യതയുണ്ട്. ബിരിയാണി അരിക്കു പുറമേ സുഗന്ധവ്യഞ്ജനങ്ങളും പച്ചക്കറികളും ഉണക്കിപ്പൊടിച്ച്, മിക്സ് ചെയ്ത് ഇത്തരം പായ്ക്കറ്റുകൾ തയാറാക്കാം. ഈ മിക്സ് ഉപയോഗിച്ച് പരമാവധി 15 മിനിറ്റ്കൊണ്ടു ബിരിയാണി തയാറാക്കി കഴിക്കാൻ കഴിയും. ഇത്തരം ബിസിനസുകൾ വീട്ടിൽത്തന്നെ പ്ലാൻ ചെയ്യാം. വലിയ നിക്ഷേപമില്ലാതെ കടന്നുവരാവുന്ന ബിസിനസ് മേഖലയാണ്. വീട്ടമ്മമാർക്കും നന്നായി ശോഭിക്കാം.

നിർമാണരീതി

ജീരകശാല, ബസുമതി അരികൾ അല്ലെങ്കിൽ മികച്ച നിലവാരമുള്ള അരികൾ പൊതുവിപണിയിൽ നിന്നു ശേഖരിക്കുന്നു. മില്ലുകളിൽ നിന്ന് നേരിട്ടു സംഭരിക്കുന്നതു നന്നായിരിക്കും. കാരറ്റ്, തക്കാളി, സവാള ഉൾപ്പെടെ പച്ചക്കറികളും മല്ലിയില, പുതിന, കറിവേപ്പില തുടങ്ങിയ ചേരുവകളും സുഗന്ധവ്യഞ്ജനങ്ങളും ഉണക്കിപ്പൊടിച്ച് പ്രത്യേകം പായ്ക്ക് ചെയ്യുന്നു.