മുൻപേ നടന്ന സന്യാസി ചട്ടമ്പിസ്വാമികൾ

നവോത്ഥാനനായകരും അവരുടെ സംഭാവനകളും മത്സരപ്പരീക്ഷകളിൽ എക്കാലത്തും പ്രധാനമാണ്. നാടിനെ നയിച്ച നായകരെ അവതരിപ്പിക്കുന്ന പംക്തി.

- ആഷ മാത്യു

കേരളത്തിന്റെ സാമൂഹിക നവോത്ഥാനത്തിൽ നിർണായക പങ്കു വഹിച്ച ആത്മീയാചാര്യനായിരുന്നു ചട്ടമ്പിസ്വാമികൾ. അറിവ് ആയുധമാക്കി അധികാരത്തോടു പോരാടിയ ജ്ഞാനയോഗിയായിരുന്നു വിദ്യാധിരാജ പരമഭട്ടാരക, തീർഥപാദർ എന്നെല്ലാം അറിയപ്പെട്ട ചട്ടമ്പിസ്വാമികൾ.

ജാതിചിന്തകൾക്കെതിരെ പ്രതികരിക്കാൻ പഠിപ്പിച്ച് കേരളീയ സമൂഹത്തിന് ആധ്യാത്മിക ദിശാബോധം നൽകിയ ഗുരുവാണ് അദ്ദേഹം. വിവേചനങ്ങൾക്കെതിരെ സന്ധിയില്ലാ പോരാട്ടമായിരുന്നു ചട്ടമ്പിസ്വാമികളുടെ ജീവിതം. സമഭാവനയും സഹജീവികളോടുള്ള കരുണയും ആ പോരാട്ടത്തിൽ ആയുധങ്ങളായി. വെള്ള മുണ്ടും തോർത്തുമായിരുന്നു വേഷം എന്നതിനാൽ "കാവിയും കമണ്ഡലുവുമില്ലാത്ത സന്യാസി' എന്നാണ് അദ്ദേഹം അറിയപ്പെട്ടത്.

അയ്യപ്പൻ ചട്ടമ്പിയായ വഴി

1853 ഓഗസ്റ്റ് 25നു തിരുവനന്തപുരം കണ്ണമ്മൂലയിലാണു ജനനം. അച്ഛൻ: താമരശ്ശേരി വാസുദേവ ശർമ, അമ്മ: നങ്കാദേവി. അയ്യപ്പൻ എന്നായിരുന്നു മാതാപിതാക്കൾ നൽകിയ പേര്. അറിയപ്പെട്ടതു കുഞ്ഞൻ എന്ന ഓമനപ്പേരിലും.

കൊല്ലൂർ മഠം പാഠശാലയിലായിരുന്നു ആദ്യകാല വിദ്യാഭ്യാസം. പേട്ടയിൽ രാമൻപിള്ള ആശാന്റെ ഗുരുകുലത്തിൽ പഠിക്കുന്ന സമയത്താണ് "ചട്ടമ്പി എന്ന പേരു വീഴുന്നത്. ഗുരുകുലത്തിലെ മറ്റു കുട്ടികളെ നിയന്ത്രി ച്ച് അച്ചടക്കം ഉറപ്പാക്കാൻ ആശാൻ നൽകിയ സ്ഥാനപ്പേരായിരുന്നു അത്. പിന്നീട് ആ പേര് ഒപ്പം കൂടി.

ബൈബിളും ഖുർ ആനുമടക്കം പഠിച്ച പല സന്യാസിമാരോടൊപ്പം തമിഴ്നാട്ടിലും മറ്റും അലഞ്ഞു. വഴിയരികിൽ കണ്ടു മുട്ടിയ അവധൂതനോടൊപ്പം മാസങ്ങളോളം വനവാസത്തിൽ കഴിഞ്ഞു. ബുദ്ധമതവും മനസ്സിലാക്കിയതോടെ എല്ലാ മതങ്ങളും ഒരേ സത്യത്തിലേക്കുള്ള പല വഴികളാണെന്ന തിരിച്ചറിവാണു കുഞ്ഞൻ ആർജിച്ചത്.