മുടിയുന്ന ന്യുജൻ മലയാള സിനിമ

മാഫിയ. ലഹരി, ഈഗോ

- അപ്പൂസ്. കെ.എസ്

90 വർഷത്തെ പാരമ്പര്യം വിളിച്ചോതുന്ന മലയാള സിനിമയിൽ ഇതുവരെ സംഭവിക്കാത്ത ശബ്ദമുയർത്തിയതും തുറന്നുപറച്ചിലുകളുമാണ് ഇപ്പോൾ ചർച്ചാവിഷയം. ഒരിടക്കാലത്ത് മലയാളസിനിമയിൽ നിന്നും നഷ്ടപ്പെട്ടുപോയ അച്ചടക്കം തിരിച്ചുപിടിക്കുന്ന നടപടികളും ശുദ്ധികലശവുമൊക്കെയാണ് ഓരോ ദിവസവും കണ്ടു കൊണ്ടിരിക്കുന്നത്. പ്രതിഫലം വാങ്ങി കീശയിൽ പൂഴ്ത്തി നിർമ്മാതാവിനെയും സംവിധായകനെയും പറ്റിച്ച് സ്വന്തം കാര്യം നോക്കുന്ന ഏതൊരു കലാകാരനെയും വരച്ചവരയിൽ നിർത്തണം എന്നുതന്നെയാണ് പൊതുജനത്തിന്റെയും അഭിപ്രായം. സിനിമാസംഘടനകളുടെ നേതൃത്വത്തിൽ ഇതിനെതിരെ ശക്തവും നിഷ്പക്ഷവുമായ നടപടികൾ മുന്നോട്ടു വന്നു കൊണ്ടിരിക്കുകയാണ്. അതിൽ ഷെയിൻ  നിഗത്തിനെയും ശ്രീനാഥ് ഭാസിയെയും വിലക്കിയാണ് ആദ്യശുദ്ധികലശത്തിന് ആരംഭം കുറിച്ചിരിക്കുന്നത്. ഇതാദ്യമായല്ല ഈ രണ്ട് നടന്മാരുടെ പേരുകളും ചർച്ചകളിൽ വരുന്നത്. പലതവണ താക്കീത് നൽകിയിട്ടും വീണ്ടും വീണ്ടും തെറ്റുകൾ ആവർത്തിക്കപ്പെടുന്നവർക്ക് കൊടുക്കേണ്ട ശിക്ഷ തന്നെയാണ് സംഘടന ഇപ്പോൾ നൽകിയിരിക്കുന്നത് എന്ന് പ്രേക്ഷകസമൂഹവും വിധിയെഴുതുന്നു.

സിനിമ എന്നത് ഒരാളുടെ മാത്രം വിജയമല്ല. അതിൽ ഒരു പാടുപേരുടെ പ്രയത്നവും വിയർപ്പുമുണ്ട്. ഒരാൾക്കുവേണ്ടി മാത്രം സിനിമയുടെ സമയവും ധനവും നഷ്ടപ്പെടുത്തേണ്ട ആവശ്യമില്ല. പക്ഷേ ഇത്തരം തെറ്റുകൾ കാണുമ്പോൾ തന്നെ അത് ചൂണ്ടിക്കാണിക്കുകയും അത് അവിടെത്തന്നെ നിർത്തേണ്ട സിനിമാപ്രവർത്തകർ ധൈര്യവും കാണിക്കേണ്ടതുണ്ട്. താരങ്ങൾക്ക് പല രീതിയിലും ആവശ്യവും അനാവശ്യവുമായ താരാധിപത്യം നൽകി അവരെ വഷളാക്കി വളർത്തിയതിൽ തങ്ങൾക്കുള്ള പങ്കിനെപ്പറ്റി സംഘടനകളും ഇപ്പോൾ പശ്ചാത്തപിക്കുകയാണ്.