ഒരു സ്വപ്നംപോലെ ജീവിതം

സിനിമാമേഖലയിൽ പുത്തൻ പ്രതീക്ഷകളുമായി ജയശങ്കർ

- ബിന്ദു പി.പി

നമുക്ക് മുൻപേ സിനിമയിൽ വന്നവർ മദ്രാസിൽ സിനിമ തേടിപ്പോയി കോടമ്പാക്കത്ത് പൈപ്പിന് കീഴിൽ നിന്ന് വെള്ളം കുടിച്ചതും സ്ട്രഗിൾ ചെയ്ത കഥയുമെല്ലാം കേട്ടിട്ടുണ്ട്. അതു പോലെ അല്ലെങ്കിലും വെറും ഒരു അറുപത് രൂപ കൊണ്ട് ചെന്നൈയിൽ നിന്ന് ഇങ്ങോട്ട് ട്രെയിൻ കയറിയ കഥ എനിക്കുമുണ്ട്. സെല്ലുലോയ്ഡിൽ ഒരു ക്രൗഡ് ഷോട്ടിൽ മുഖം കാണിച്ചാണ് ഞാൻ മലയാള സിനിമയുടെ ഭാഗമാവുന്നത്. അതിനു ശേഷം തമിഴിൽ നിന്ന് ഒരു അവസരം വരുന്നു. ശിവകാർത്തികേയൻ നായകനാവുന്ന സിനിമയിൽ പ്രധാനപ്പെട്ടൊരു വേഷം. അദ്ദേഹത്തിന്റെയും തുടക്കകാലം. നാട്ടിലും വീട്ടിലും പുതിയ സിനിമയിലെ അവസരം ആഘോഷമാക്കി. എവിഎം സ്റ്റുഡിയോയിൽ വച്ച് പൂജ. അതെല്ലാം അത്ഭുതമായിരുന്നു. അവിടെയുള്ള ചാനലുകാരുടെ ഇന്റർവ്യൂ. എല്ലാം ഒരു സ്വപ്നം പോലെ തോന്നിയ നിമിഷമായിരുന്നു. ഇത്ര എളുപ്പമായിരുന്നോ സിനിമ എന്നത് എന്റെ ഉറക്കത്തെപ്പോലും കളഞ്ഞ രാത്രി.

നല്ല സൗകര്യമുള്ള ഹോട്ടൽ മുറി. നാല് ദിവസം അതിനിടയിൽ അവർക്ക് നായികയെ കിട്ടിയില്ലെന്നും പ്രൊഡക്ഷന് ഫണ്ട് ചെയ്യാൻ ആരുമില്ലെന്നുമൊക്കെ കേട്ടിരുന്നുവെങ്കിലും സിനിമാ ഷൂട്ട് ഉടനെ തുടങ്ങുമെന്നാണ് അവരുടെ ഭാഗത്ത് നിന്ന് കിട്ടിയ വിവരം. നാല് ദിവസം കഴിഞ്ഞപ്പോൾ ഹോട്ടൽ മുറിയിൽ നിന്ന് ഇറങ്ങാനും നിന്ന ദിവസത്തെ വാടക തരാനും ഹോട്ടൽ ജീവനക്കാർ ആവശ്യപ്പെട്ടപ്പോഴാണ് ഞാൻ പെട്ടുപോയെന്ന് മനസ്സിലാക്കിയത്. എന്നെ കോൺടാക്ട് ചെയ്തവരെ ഒന്നും തിരിച്ചു വിളിച്ചിട്ടകിട്ടുന്നില്ല. പേഴ്സിലാണെങ്കിൽ ആകെ ഒരു അറുപത് രൂപ.