കുഞ്ഞുങ്ങൾക്ക് മരുന്ന് നൽകുമ്പോൾ

കുട്ടികൾക്ക് മരുന്ന് നൽകുമ്പോൾ ഒട്ടേറെ കാര്യങ്ങളിൽ അതീവ ശ്രദ്ധവേണം. മരുന്നുകളുടെ അളവ്, അവ നൽകേണ്ട സമയം, കാലയളവ് എന്നിവയിലെ ചെറിയ വ്യത്യസങ്ങൾ പോലും കുട്ടികൾ ക്ക് അപകടകരമായേക്കാം

- ഡോ:എം.മുരളീധരൻ ശിശുചികിത്സാവിദഗ്ധൻ വടകര

കുഞ്ഞുങ്ങൾക്ക് അസുഖങ്ങൾ വരുന്നത് കുടുംബത്തിനാകെ നെഞ്ചിടിപ്പേറ്റുന്ന കാര്യമാണ്. കുഞ്ഞുങ്ങളാവട്ടെ ചെറിയ അസുഖം വന്നാൽ പോലും കളിയും ചിരിയും അപ്പാടെ നിർത്തി കരച്ചിലിലേക്ക് വഴി മാറും. കുഞ്ഞുങ്ങൾക്ക് മരുന്നുകൾ നൽകുമ്പോൾ എന്തൊക്കെ കാര്യങ്ങളാണ് പ്രത്യേകം ശ്രദ്ധിക്കേണ്ടത് എന്ന് നോക്കാം.

അളവുകൾ പ്രധാനം

കുഞ്ഞുങ്ങളുടെ തൂക്കമനുസരിച്ചാണ് ഔഷധപ്രയോഗം എന്നതിനാൽ ചെറിയ അളവ് വ്യത്യാസങ്ങൾ പോലും കുഞ്ഞുങ്ങളുടെ ആരോഗ്യത്തെ കാര്യമായി ബാധിച്ചേക്കും. മരുന്നുകൾ കൃത്യമായ അളവിൽ നൽകാൻ നല്ല ജാഗ്രത അത്യാവശ്യമാണ്. ഒരു ടീസ്പൂൺ എന്നുപറഞ്ഞാൽ വീട്ടിലെ ഏതെങ്കിലും സ്പൂണല്ല, മറിച്ച് 5 മില്ലി ലിറ്റർ ആണ് എന്ന കാര്യം ഓർത്തുവയ്ക്കണം. ഇപ്പോൾ മിക്കവാറും മരുന്നുകുപ്പികളോടൊപ്പം മരുന്ന് അളന്നുനൽകുവാനുള്ള 5-10 മില്ലി ലിറ്ററിന്റെ ചെറിയ പ്ലാസ്റ്റിക് അളവുപാത്രങ്ങളും ഉണ്ടാവാറുണ്ട്. ഒരു മില്ലി ലിറ്റർ 16 തുള്ളികളാണ് എന്ന വസ്തുത ഓർക്കുന്നതും ഒരു വയസ്സിന് താഴെയുള്ള കുട്ടികൾക്ക് മരുന്ന് നൽകുമ്പോൾ പ്രധാനമാണ്. പൊടിരൂപത്തിൽ കുപ്പികളിൽ ലഭ്യമാവുന്ന മരുന്നുകൾ, അവയോടൊപ്പം ലഭ്യമാവുന്ന ശുദ്ധജലമോ അതല്ലെങ്കിൽ തിളപ്പിച്ചാറിയ വെള്ളമോ കൃത്യമായ അളവിൽ ഒഴിച്ച് വേണം മരുന്ന് ലായനി തയാറാക്കാൻ, മരുന്ന് ലായനി ഉണ്ടാക്കാൻ എത്ര ജലം ചേർക്കണം എന്ന് മനസ്സിലാക്കാൻ കുപ്പികളിൽ അടയാളങ്ങളുണ്ടാവും.