ഒരു നിമിഷത്തെ ധ്യാനം

ജീവിതത്തിന്റെ തിരക്കുകൾക്കിടയിൽ അമർന്നുപോകുമ്പോൾ ഒരു നിമിഷം അതിൽ നിന്ന് മാറിനിൽക്കുക. സ്വയം തളിരിടുന്നതുപോലുള്ള സുഖാനുഭവം അത് പകർന്ന് നൽകും

- - ധ്യാൻതർപൺ

ശരീരത്തിന്റെ അതിരുകൾ നമ്മുടെ വസ്ത്രങ്ങൾ നിശ്ചയിക്കുന്നതല്ല. അതിനുമപ്പുറത്തേക്ക് അദൃശ്യമായി നമ്മുടെ ശരീരം നിലനിൽക്കുന്നുണ്ട്. അതുകൊണ്ടാണല്ലോ മറ്റൊരു വ്യക്തിയോട് ചേർന്ന് നിൽക്കേണ്ടിവരുമ്പോൾ മിക്കപ്പോഴും ചില അകലങ്ങൾ നാം പാലിക്കുന്നത്. ഒരു പരിധി കഴിഞ്ഞാൽ മറ്റെയാൾ നമ്മുടെ ശരീരപരിധി ലംഘിച്ചുവെന്ന് നമുക്ക് തോന്നാറുണ്ട്. അതുകൊണ്ടാണ് ശരീരം കൊണ്ട് പരസ്പരം തൊട്ടുരുമ്മിയില്ലെങ്കിലും രണ്ടു വ്യക്തികൾ തമ്മിൽ വല്ലാത്ത അടുപ്പം സംഭവിക്കുന്നത്. പ്രത്യക്ഷത്തിൽ ഒരു കാരണമില്ലാഞ്ഞിട്ടും മറ്റൊരു വ്യക്തിയോട് അകൽച്ച തോന്നുന്നതും ആ വിധം തന്നെ നേരിട്ട് കാണാതെത്തന്നെ എത്രയോ ദൂരെയിരിക്കുന്ന വ്യക്തിയോട് പോലും വൈകാരികമായ വിനിമയങ്ങൾ സംഭവിക്കാറുണ്ട്.

സൂക്ഷ്മമായി നോക്കിയാൽ മനസ്സിലാവുന്നത്. തൊട്ടുനോക്കാവുന്ന ഈ ശരീരം കൊണ്ട് ചെയ്യുന്ന ഓട്ടം, ചാട്ടം, സ്പർശം തുടങ്ങിയ ഏതു പ്രവൃത്തികളേക്കാളും പ്രാധാന്യമർഹിക്കുന്ന പ്രവൃത്തികളെല്ലാം സാധ്യമാവുന്നത് നമ്മുടെ അദൃശ്യ ശരീരം കൊണ്ടാണ്. ചിന്തകൾ, വികാരങ്ങൾ, കണക്കുകൂട്ടലുകൾ, ഭാവനകൾ എന്നിങ്ങനെ. പക്ഷെ ഈ അദൃശ്യ ശരീരത്തെ നാം ശരീരമെന്നറിയാറില്ലന്നേയുള്ളൂ. അദൃശ്യമായ ശാരീരിക പ്രവൃത്തിക ളെയെല്ലാം കൂടി പൊതുവേ നാം മനസ്സെന്ന പട്ടികയിൽ ഉൾപെടുത്തിയിരിക്കുകയാണ്.