മധുരതരമാക്കാം മധ്യവയസ്സ്

 ഒട്ടേറെ ഉത്തരവാദിത്വങ്ങളുടെ നടുവിലൂടെയാണ് മധ്യവയസ്സിലെത്തിയവർ കടന്നുപോകുന്നത്. കുട്ടികളെയും മുതിർന്നവരെയുമൊക്കെ സുരക്ഷിതരാക്കുന്ന തിരക്കുകൾക്കിടയിലും ആഹ്ലാദഭരിതരായി ആരോഗ്യത്തോടെയുള്ള ജീവിതം നയിക്കാൻ അല്പം ശ്രദ്ധ വേണമെന്നുമാത്രം

- ഡോ.ടി.പി.മെഹറൂഫ്രാജ് മെഡിക്കൽഅഡ്മിനിസ്ട്രേറ്റർ സീനിയർ മെഡിക്കൽകൺസൽട്ടന്റ്, വി.പി.എസ്. ലക്ഷാർ മെഡിക്കൽ സെന്റർ, കോഴിക്കോട്

ശരീരത്തിൽ കാലക്രമേണ നടക്കുന്ന വൃദ്ധിക്ഷയങ്ങളുടെ ഫലമായാണ് മനുഷ്യന് പ്രായമേറുന്നത്. അതിനനുസരിച്ച് ശാരീരികവും മാനസികവുമായ ശേഷികൾക്കും കുറവ് വരുന്നുണ്ട്. വ്യക്തിയുടെ ആയുർദൈർഘ്യം കൂടിവരുകയാണ്. അതോടൊപ്പം യൗവനം, വാർധക്യം എന്നീ അവസ്ഥകളുടെ നിർവചനവും മാറിയിട്ടുണ്ട്. ഒരുപക്ഷേ, ഈ അവസ്ഥകളെ കൂടുതലായി അഭിസംബോധന ചെയ്യാൻ മാറുന്ന കുടുംബ - സാമൂഹിക സാഹചര്യങ്ങൾ പ്രേരിപ്പിക്കുന്നുണ്ടാകാം.

പരിഗണിക്കണം മധ്യവയസ്സിനെ

 കൗമാരവും യൗവനവും വാർധക്യവുമൊക്കെ വേണ്ടത്ര പരിഗണിക്കപ്പെടുന്നുണ്ടെങ്കിലും മധ്യവയസ്സിന്റെ പ്രാധാന്യത്തെക്കുറിച്ച് സമൂഹത്തിൽ വലിയ തോതിൽ ചർച്ച ചെയ്യപ്പെടുന്നില്ല.ഒരുപക്ഷേ, ഏറ്റവും അധികം കടമകളും ബാധ്വതകളും നിർവഹിക്കേണ്ടതും അതിനനുസരിച്ച് കൂടുതൽ മാനസികസമ്മർദം പേറുകയും ചെയ്യുന്ന കാലമാണിത്. ഒരു ഭാഗത്ത് മക്കളും പേരക്കിടാങ്ങളും മറുവശത്ത് പ്രായമേറിയ മാതാപിതാക്കളുമായി കുടുംബത്തിലെ സവിശേഷ സ്ഥാനമാണ് മധ്യവയസ്കരുടെത്.

ഉപജീവനമാർഗവും സമ്പാദ്യവും ഉറപ്പാക്കുക, കുടുംബം, വീട് എന്നിവ സ്ഥാപിക്കുക, മക്കൾക്ക് വിദ്യാഭ്യാസവും തണലും നൽകുക, സാമൂഹികമായ അംഗീകാരം നേടുക, ഭാവിയിലേക്ക് വേണ്ട മുന്നൊരുക്കങ്ങൾ നടത്തുക, കൂട്ടായ്മകളിലും സാമൂഹിക സൃഷ്ടിയിലും അണി ചേർക്കുക എന്നിങ്ങനെ ബഹു മുഖമാണ് ഇവരുടെ കർമമേഖല. ഇക്കൂട്ടരാണ് നമ്മുടെ പ്രധാന വർക്ക് ഫോഴ്സ്.

ഉത്തരവാദിത്വങ്ങൾ പെരുകുമ്പോൾ