ഉയരുന്ന ആരോഗ്യച്ചെലവ്

 മികച്ച നിലയിൽ ആരോഗ്യ ഇൻഷുറൻസ് പദ്ധതി നടപ്പിലാക്കിയിട്ടും എന്തുകൊണ്ടാണ് കേരളത്തിൽ സ്വകാര്യ ആരോഗ്യച്ചെലവ് വളരെ ഉയർന്നുനിൽക്കുന്നത് എന്നതിനെ ക്കുറിച്ച് ഗൗരവമായ പഠനം നടത്തുകയും പരിഹാരം കണ്ടെത്തുകയും ചെയ്യണം

- ഡോ.ബി.ഇക്ബാൽ

കേരളത്തിലെ പൊതുജനാരോഗ്യ സംവിധാനം വളരെയധികം മെച്ചപ്പെട്ടിട്ടുണ്ട്. എന്നാൽ ദേശീയ ഹെൽത്ത് അക്കൗണ്ടസ് കമ്മിറ്റിയുടെ കണക്കനുസരിച്ച് രാജ്യത്ത് പ്രതിശീർഷ ആരോഗ്യച്ചെലവ് ഏറ്റവും കൂടുതലുള്ള സംസ്ഥാനമാണ് കേരളം. 2018-19 ലെ കണക്കനുസരിച്ച് മൊത്തം ആരോഗ്യച്ചെലവ് 34,548 കോടി രൂപയാണ്. ഇത് സംസ്ഥാന വരുമാനത്തിന്റെ 1.1 ശതമാന വും പൊതുചെലവിന്റെ 7.4 ശതമാനവും വരും. എന്നാൽ ഇതിൽ സർക്കാർ ചെലവ് 8,676 കോടി മാത്രമാണ്. അതായത് 25.1 ശതമാനം മാത്രം. 68.60 ശതമാനം വരുന്ന 23,702 കോടി രൂപ ജനങ്ങളുടെ ഭാഗത്തുനിന്നുള്ള സ്വകാര്യ ചെലവാണ് (Out Of Pocket Expenditure: OOPE. അതായത് മൊത്തം പ്രതിശീർഷ ആരോഗ്യച്ചെലവ് 9,871 രൂപയായിരിക്കുമ്പോൾ, ഇതിൽ 2,479 രൂപ മാത്രമാണ് സർക്കാർ ചെലവ്. ബാക്കി 6,772 രൂപയും ജനങ്ങൾ സ്വന്തം കൈയിൽ നിന്ന് മുടക്കുന്നതാണ്.

ആരോഗ്യമേഖലയിൽ മികച്ച നേട്ടങ്ങൾ കൈവരിച്ച മറ്റൊരു സംസ്ഥാനമായ തമിഴ്നാടുമായി താരതമ്യം ചെയ്യുമ്പോൾ കേരളത്തിലാണ് സ്വകാര്യ ചെലവ് കൂടുതലെന്ന് കാണാം. തമിഴ്നാട്ടിലെ 2018-19 ലെ മൊത്തം ആരോഗ്യച്ചെലവ് 32,767 കോടിയാണ്. അതിൽ 46.9 ശതമാനവും സർക്കാർ ചെലവാണ്. സ്വകാര്യ ചെലവ് 44.3 ശതമാനം മാത്രം.1,909 രൂപ മാത്രമാണ് തമിഴ്നാട്ടിലെ പ്രതിശീർഷ സ്വകാര്യ ആരോഗ്യച്ചെലവ്. കേരളത്തിലെ സ്വകാര്യ ചെലവ് ഇതിന്റെ മൂന്നിരട്ടിയാണ്.