കൃത്രിമപ്പല്ലുകൾ വയ്ക്കുമ്പോൾ

ഭക്ഷണം ചവച്ചരയ്ക്കാനുള്ള ബുദ്ധിമുട്ട് ഒഴിവാക്കാനും മോണരോഗങ്ങൾ, മറ്റുപല്ലുകളുടെ തേയ്മാനം മുതലായവ ഒഴിവാക്കാനും കൃത്രിമപ്പല്ലുകൾ വയ്ക്കുന്നത് സഹായിക്കും

- ഡോ.വി.പി.പ്രഭാത്സിങ്

നഷ്ടപ്പെട്ട പല്ലുകളുടെ സ്ഥാനത്ത് വെയ്ക്കുന്ന കൃത്രിമപ്പല്ലുകൾ സൗന്ദര്യസംരക്ഷണത്തിനു മാത്രമല്ല, പല്ലുകളുടെ ആരോഗ്യകരമായ ദീർഘകാല നിലനിൽപ്പിനും ആവശ്യമാണ്. ഭക്ഷണം ചവച്ചയ്ക്കാനുള്ള ബുദ്ധിമുട്ട് ഒഴിവാക്കുന്നതു കൂടാതെ മോണ രോഗങ്ങൾ, മറ്റുപല്ലുകൾക്ക് അധികമായി വരുന്ന തേയ്മാനം, താടിയെല്ലുകളുടെ ജോയിന്റിന് വരാൻ സാധ്യതയുള്ള വേദനകൾ മുതലായവ ഒഴിവാക്കാനും കൃത്രിമപ്പല്ലുകൾ സഹായിക്കും.

സ്ഥിരമായി ഉറപ്പിച്ച വെപ്പുപല്ലുകൾ

സ്ഥിരമായി ഉറപ്പിച്ചുവെയ്ക്കുന്ന വെപ്പുപല്ലുകൾ ബ്രിഡ്ജ് (bridge), ഇംപ്ലാൻ (dental implant) എന്നിങ്ങനെ രണ്ടുതരത്തിലുണ്ട്. മറ്റുപല്ലുകളിലേക്ക് ഉറപ്പി ച്ചുവെയ്ക്കുന്നതായതുകൊണ്ട് ഇത്തരം കൃത്രിമപ്പല്ലുകളുടെ പ്രത്യേക പരിചരണം ഇവയുടെ പ്രശ്നരഹിതമായ ദീർഘകാല ഉപയോഗം സാധ്യമാക്കും. നഷ്ടപ്പെട്ട പല്ലുകളുടെ ഇരുവശവുമുള്ള പല്ലുകളിൽ കൃത്രിമ പല്ല് ഉറപ്പിക്കുന്നതാണ് ബ്രിഡ്ജ്. ഇതിനായി ഇരുവശവുമുള്ള പല്ലുകൾ അല്പം ചെറുതാക്കേണ്ടതായുണ്ട്. വളരെ അപൂർവമായി ഈ പല്ലുകൾ റൂട്ട് കനാൽ ചെയ്യേണ്ടി വരാറുണ്ട്.