വീഴ്ചയിൽ പല്ല് നഷ്ടമായാൽ

വീഴ്ചയിലും മറ്റും പല്ല് ഇളകിപ്പോയാൽ എത്രയും പെട്ടെന്ന് അത് യഥാസ്ഥാനത്ത് ഉറപ്പിക്കണം. വൈകുംതോറും പല്ല് നിലനിർത്താനുള്ള സാധ്യതയും കുറയും. പല്ലുകൾ ഇളകിപ്പോയാൽ ഉടൻ ചെയ്യേണ്ട കാര്യങ്ങൾ ഇവയൊക്കെയാണ്

- ഡോ.ശ്രീലക്ഷ്മി നിതീഷ് ഡെന്റൽസർജൻ ആലപ്പുഴ

കുട്ടികൾ കളിക്കുമ്പോഴോ അപകടങ്ങളിലോ മുഖത്ത് ശക്തമായ പ്രഹരമേൽക്കുമ്പോഴാണ് പല്ലുകൾക്ക് സ്ഥാനഭ്രംശം സംഭവിക്കുന്നത്. ഇതിൽ കുട്ടികൾക്ക് സംഭവിക്കുന്ന അപകടങ്ങളിൽ ഭൂരിഭാഗവും വീടുകളിലോ സ്കൂളിലോ വെച്ചായിരിക്കും. അതും10 -12 വയസ്സിൽ താഴെ മാത്രം പ്രായമുള്ളവരിലാണ് ഇത്തരം വീഴ്ചകൾ കൂടുതൽ ഉണ്ടാവാറുള്ളത്. പലപ്പോഴും വീഴ്ചയുടെ ആഘാതത്തിൽ പല്ലിന് ഭാഗികമായോ പൂർണമായോ പൊട്ടലുണ്ടാവുകയോ ഇളക്കം തട്ടുകയോ ആണ് പതിവ്. കുട്ടികളിൽ സ്ഥിരദന്തങ്ങൾ മുളച്ചിട്ടുണ്ടെങ്കിൽ പോലും അവയുടെ വേരുകളുടെ വളർച്ച പൂർണതയിലെത്താൻ പിന്നെയും 2- 3 വർഷം വേണ്ടിവരും. അതുകൊണ്ട് ഈ കാലഘട്ടത്തിൽ പല്ലിന് ക്ഷതമേൽക്കുന്ന തരത്തിലുള്ള അപകടങ്ങളുണ്ടാകുമ്പോൾ സ്ഥാനഭ്രംശം സംഭവിക്കാനുള്ള സാധ്യത കൂടുന്നു. പല്ലിന് ക്ഷതമേൽക്കുമ്പോൾ, പല്ലിനെ ചുറ്റുമുള്ള എല്ലിന്റെ ആവരണത്തോട് ബന്ധിപ്പിക്കുന്ന പെരിയോഡോണ്ടൽ ലിഗമെന്റ് (Periodontal Ligament-Pdl) ഫൈബറുകൾക്ക് താങ്ങാവുന്ന തിലും അധികം ബലം നേരിടേ ണ്ടിവരുകയാണെങ്കിൽ അത് ഛേദിക്കപ്പെടും. തത്ഫലമായി പല്ലിന് ചുറ്റുമുള്ള എല്ലുമായുള്ള ബന്ധം നഷ്ടമാവുകയും ചെയ്യും. വേരിന് പൂർണവളർച്ച എത്താ ത്ത ഘട്ടത്തിൽ താരതമ്യേന ചെറിയ ബലംകൊണ്ടുപോലും സ്ഥാനഭ്രംശം സംഭവിക്കാം. സ്ഥിരദന്തങ്ങളാണെങ്കിലും പാൽ പല്ലുകളാണെങ്കിലും മുകളിലെ മുൻനിരയിലുള്ള പല്ലുകളാണ് സാധാരണ ഇത്തരത്തിൽ നഷ്ടമാവാറുള്ളത്. പ്രത്യേകിച്ചും അല്പം ഉന്തിയ പല്ലുകളുള്ളവരിൽ ഇതിനുള്ള സാധ്യത കൂടുതലാണ്. 

പാൽപ്പല്ലുകൾ വീഴ്ചയിൽ നഷ്ടമായാൽ