രോഗപ്രതിരോധത്തിന്റെ ശാസ്ത്രീയവഴികൾ

പല രോഗങ്ങളെയും പ്രതിരോധിക്കുന്നതിൽ വാക്സിനുകൾ പ്രധാന പങ്കുവഹിക്കുന്നുണ്ട്. അവ കൃത്യമായി നൽകുന്നത് കുഞ്ഞുങ്ങളുടെ ആരോഗ്യം സുരക്ഷിതമാക്കാൻ സഹായിക്കും

- ഡോ.എം.മുരളീധരൻ കൺസൾട്ടന്റ്പീഡിയാട്രിഷൻ ആഷാഹോസ്പിറ്റൽ, വടകര

ലോകത്തെമ്പാടും  മരണം വിതച്ച വസൂരി എന്നന്നേക്കുമായി തൂത്തെറിഞ്ഞത്, വസൂരിക്കെതിരായ കുത്തിവെപ്പ് (Smallpox Vaccine) വഴിയായിരുന്നു. എഴുപതുകളുടെ അവസാനത്തിലായിരുന്നു ഈ നിർണായക വിജയം. പോളിയോക്കെതിരേയുള്ള പോരാട്ടത്തിലും വിജയിച്ചത്, സമൂഹത്തിൽ പോളിയോ വാക്സിന്റെ കൃത്യമായ വിന്യാസം സാധിച്ചെടുത്തതു കൊണ്ടുമാത്രമാണ്.

2011- ലാണ് ഇന്ത്യയിൽ അവസാനമായി പോളിയോ റിപ്പോർട്ട് ചെയ്തത്. പതിനായിരക്കണക്കിന് കുട്ടികളെ ജീവിതകാലം മുഴുവൻ അംഗപരിമിതരാക്കിയ ആ അസുഖം ഇന്ന് നമ്മുടെ നാട്ടിൽ പുതുതായി റിപ്പോർട്ട് ചെയ്യപ്പെടുന്നില്ല. പണ്ടൊക്കെ നാട്ടിൽ സാധാരണമായിരുന്ന വില്ലൻചുമയോ, ഡിഫ്ത്തീരിയയോ, ടെറ്റനസോ ഇന്ന് അത്രമേൽ അപൂർവമായിത്തീർന്നിരിക്കുന്നു. അങ്ങനെ ആരോഗ്യപരി പാലനത്തിൽ ഒരു യഥാർഥ വിപ്ലവംതന്നെ സൃഷ്ടിച്ചവയാ വാക്സിനുകൾ.