பிரபலங்களை பந்தாடும் அரசியல் விளையாட்டு?

அரசியல் என்பது கட்சிகளின் எல்லைகளோடு நின்று கொள்வதில்லை. அதையும் தாண்டி, கலை, இலக்கியம், சினிமா, விளையாட்டு என்று எல்லா துறைகளிலும் புகுந்து விளையாடுகிறது.

- நெல்லைபரிதி

அதை உறுதிப்படுத்துவது போல் நடிகை பிரியங்கா சோப்ராவின் சமீபத்திய கருத்து உள்ளது.

ஆங்கில ஊடகம் ஒன்றுக்கு பேட்டியளித்த போது, "பாலிவுட் சினிமாவில் இருந்து நான் ஓரம் கட்டப்பட்டேன். பட வாய்ப்புகள் படிப்படியாக குறைய தொடங்கின. எனக்கு அங்கு நடந்த அரசியல் சரியாகப்படவில்லை. எனக்கு சற்று ஓய்வு தேவைப்பட்டது. அதே நேரத்தில் ஹாலிவுட்டில் வாய்ப்பு வந்ததால் இந்தியாவை விட்டு வெளியேறிவிட்டேன்” என்று கூறினார்.

உண்மையை சொல்லபோனால், வழக்கமாகவே பிரியங்கா சோப்ரா பல்வேறு கருத்துகளை துணிச்சலாக பேசிவந்தவர். அதுவே பாஜக ஆதரவு நடிகை கங்கனா ரனாவத்துடன் கருத்து மோதலுக்கு காரணமானது.

கடந்த செப்டம்பரில் ஐக்கிய நாடுகள் பொது சபையில் உரையாற்றினார். அப்போது, காலநிலை நெருக்கடியின் காரணமாக ஏற்படும் வாழ்க்கை சூழல் மாற்றம், வறுமை,பசிப்பட்டினி, சமத்துவமின்மை, போன்ற பிரச்சினைகளுக்கு எதிராக உலக நாடுகள் நீண்ட நாட்களாக போராடி வருகின்றன. இந்த நெருக்கடிகள் ஏதோ சந்தர்ப்பங்களால் உருவானவையல்ல, திட்டமிட்டு உருவாக்கப்பட்டவை' என்று நெற்றியடி அடித்தார்.

பிரியங்கா சோப்ராவின் புலம்பல் பேட்டி வெளியானவுடன், அவருக்கு எதிராக வழக்கம் போல் கங்கனா சீறுவார் என எதிர்பார்த்தால்... 'பிரியங்கா சோப்ரா ஹாலிவுட்டை விட்டு பிரிய இயக்குனர் கரண் ஜோஹர் தான் காரணம்' என ட்வீட் தட்டிவிட்டு எரிகிற பிரச்சினையில் எண்ணெய்யை ஊற்றினார்.

அதே போல் கங்கனா ரனாவத்தின் ட்வீட்டை ஷேர் செய்த நடிகை மீரா சோப்ரா, இன்னமும் பாலிவுட் பிரபலங்களின் வாரிசுகள் மட்டுமே அங்கே சம்பாதிக்க முடியும், எவ்வளவு தான் சாதித்தாலும், அவுட்சைடர் அவுட்சைடர் தான் என்கிற நிலை பாலிவுட்டில் இன்னமும் நிலவி வருவதாக, பெரும் போடாக போட்டிருக்கிறார்.

ஆனால், பிரியங்கா சோப்ரா முடங்கிப்போகாமல் ஹாலிவுட் நடிகையாக தன்னை உயர்த்திக்கொண்டு பாலிவுட்டில் அவரை கார்னர் செய்தவர்களின் கன்னத்தில் பளார் என ஒரு அறை விட்டு இருக்கிறார்... என அதிரடியாக தனது உறவினரான பிரியங்கா சோப்ராவை பாராட்டி போட்டுள்ள ட்வீட் ரசிகர்களின் கவனத்தை கவர்ந்துள்ளது.