ഗ്രാൻഡ് ആണ് ഗ്രാൻഡ് അരീന

മറ്റെവിടെയും കാണാത്ത വിധത്തിൽ കാർ കയറുന്ന ഹാൾ, ലക്ഷ്വറി ഹാളും ബാത്റൂമുകളും... ഗ്രാൻഡ് അരീന കൺവൻഷൻ സെന്റർ ഒരു അദ്ഭുതമാണ്

ആകാംക്ഷയോടെ കാത്തിരിക്കുന്ന, ക്ഷണിക്കപ്പെട്ട അതിഥികൾക്കിടയിലൂടെ ഹാളിനുള്ളിലേക്ക് ഒരു വിന്റേജ് കാർ പ്രവേശിക്കുന്നു. വാതിൽ തുറന്ന് വധുവരൻമാർ പുറത്തിറങ്ങുന്നു. നൃത്തവാദ്യ അകമ്പടികളോടെ നവദമ്പതികൾ അലങ്കരിച്ച സ്റ്റേജിലേക്ക്... വിവാഹം സ്വർഗത്തിലാണ് നടക്കുന്നത് എന്ന ചൊല്ല് എല്ലാ അർഥത്തിലും ഇവിടെ അന്വർഥമാകുന്നു.

ഹാളിനുള്ളിലേക്ക് കാർ കയറ്റുന്ന വീഡിയോ കൈമാറിക്കിട്ടിയവർ കൗതുകത്തോടെ ചോദിച്ചു, “ഏതാണീ ഹാൾ'? കോട്ടയം ജില്ലയിലെ  ഏറ്റുമാനൂരിനടുത്ത് പട്ടിത്താനത്തുള്ള ഗ്രാൻഡ് അരീന കൺവൻഷൻ സെന്റർ ഉടമ രാജേഷ് മാത്യു , തന്റെ വ്യത്യസ്തമായ ആശയങ്ങൾക്കു കിട്ടുന്ന അഭിനന്ദനങ്ങൾക്കിടയിലാണ്.

സൗകര്യങ്ങൾ എല്ലാമുള്ള എസി ഹാളിന് ഇനിയുള്ള കാലത്ത് ഡിമാൻഡ് ഉണ്ടാകും എന്ന തോന്നൽ പെട്ടെന്ന് ഉദിച്ച ഒന്നായിരുന്നില്ല രാജേഷിന്. 18 ഏക്കർ പറമ്പിൽ റബർ തോട്ടവും ക്വാറി ബിസിനസ്സുമൊക്കെ നടത്തുന്നതിനിടയിലാണ് ഒരു വീട് ഡിസൈൻ ചെയ്തു വിൽക്കാൻ അവസരം കിട്ടുന്നത്. അത് വിജയകരമായതോടെ ഡിസൈനിങ്ങിലേക്കും തുടർന്ന് നിർമാണത്തിലേക്കും ചുവടുമാറ്റി.