കലയുടെ തുടിപ്പ്

ഒരേപോലെ ചിന്തിക്കുന്ന മൂന്നു കൂട്ടുകാർ മൂന്നുവർഷം മുമ്പ് ഒരു കലാസംരംഭം തുടങ്ങി. കല പഠിക്കുന്നതിൽ ചില അയിത്തങ്ങൾ നിലനിൽക്കുന്നുണ്ട്. ഇതിന് മാറ്റംവരുത്താനായി കലയുടെ ചട്ടക്കൂട് ഒന്ന് ഇളക്കിമറിക്കണമെന്ന് അവരുറപ്പിച്ചു

- പി. ജസീല

നൃത്തം ഏതു പ്രായത്തിൽ പഠിച്ചുതുടങ്ങണം? മെയ്വഴക്കം കിട്ടണമെങ്കിൽ നാലോ അഞ്ചോ വയസ്സിൽ തുടങ്ങുന്നതാണ് നല്ലതെന്നാണ് പൊതു മതം. എന്നാൽ, ഈ ചോദ്യം അഞ്ജലി കൃഷ്ണദാസിനോടാണങ്കിൽ ഏതു പ്രായത്തിലും പഠിക്കാം എന്നായിരിക്കും മറുപടി. നല്ല താൽപര്യമുണ്ടാകണമെന്നു മാത്രം. ആരാണീ അഞ്ജലി എന്നല്ലേ... അത് വഴിയെ പറയാം.

ഒരുപോലെ മിടിക്കുന്ന ഹൃദയങ്ങൾ

ഒരേപോലെ ചിന്തിക്കുന്ന മൂന്നു കൂട്ടുകാർ മൂന്നുവർഷം മുമ്പ് ഒരു കലാസംരംഭം തുടങ്ങി. കലയെ ജീവനായി കൊണ്ടുനടക്കുന്നവരായിരുന്നു മൂവരും. പഠിച്ച കാര്യങ്ങൾ മറ്റുള്ളവരിലേക്കുകൂടി പകർന്നുനൽകണം എന്ന ആഗ്രഹത്തിനുപുറമെ, വരേണ്യ വിഭാഗങ്ങൾ കൈയടക്കി വെച്ചിരുന്ന ക്ലാസിക്കൽ കലാരൂപങ്ങൾ സമൂഹത്തിലെ താഴേക്കിടയിലുള്ള വിഭാഗങ്ങളിലേക്കും എത്തിക്കണമെന്ന് അവർ ആഗ്രഹിച്ചു. അവസരം കിട്ടാഞ്ഞതിനാൽ നൃത്തം പോലുള്ള ശാസ്ത്രീയ കലകൾ അഭ്യസിക്കാൻ കഴിയാത്തവരുണ്ട്. കലക്ക് രാഷ്ട്രീയമില്ല എന്നാണ് പൊതുവേ പറയാറുള്ളതെങ്കിലും കല പഠിക്കുന്നതിൽ ചില അയിത്തങ്ങൾ നിലനിൽക്കുന്നുണ്ട്. ഇതിന് മാറ്റംവരുത്താനായി കലയുടെ ചട്ടക്കൂട് ഒന്ന് ഇളക്കിമറിക്കണമെന്ന് അവരുറപ്പിച്ചു. അവരുടെ ചിന്തകൾ സംയോജിച്ച് ഒരു കൂട്ടായ്മയുണ്ടായി. തുടിപ്പ് എന്നാണ് അതിന്റെ പേര്. ഇപ്പോൾ ഒരു പാട് പേരുടെ ഹൃദയത്തുടിപ്പായി മിടിക്കുകയാണ് ഈ ഫണ്ടേഷൻ. അവരിലൊരാളാണ് അഞ്ജലി കൃഷ്ണദാസ്. പിന്നെ പൊന്നു സഞ്ജീവ്. മൂന്നാമൻ ദിവാകരൻ അരവിന്ദ്. ഇവരുടെ ആർട്ട് ഫൗണ്ടേഷന്റെ പേരാണ് 'തുടിപ്പ്’.

പേരിലെ വൈവിധ്യം 

ഒന്നിനെയും പ്രതിനിധാനം ചെയ്യുന്ന ഒരുപേര് ആവരുതെന്ന് നിർബന്ധമുണ്ടായിരുന്നുവെന്ന് അഞ്ജലി പറയുന്നു. മനുഷ്യരുമായി ഏറ്റവും അടുത്തു നിൽക്കുന്ന ഒന്നാവുകയും വേണം. ചലനാത്മകമായ ഒരു സന്തോഷം പ്രദാനം ചെയ്യുകയും വേണം. അങ്ങനെ ആലോചിച്ചപ്പോൾ മനസ്സിലേക്ക് വന്നതാണ് തുടിപ്പ് എന്ന പേര്. തുടിപ്പിന് ജീവിതവുമായി ബന്ധമുണ്ട്. എപ്പോഴും തുടിച്ചു കൊണ്ടിരിക്കുന്നതുമാണ്. അങ്ങനെ ആ പേരങ്ങുറപ്പിച്ചു. അലി തുടർന്നു.