કોલેજસ્ય પ્રથમ દિને..!!

અરે, મેડમ, હું તો આજે બસ લાગણી જ લાગણી અનુભવી રહ્યો છું! ! અહીં આવ્યા પછી મને ખબર પડી કે મારામાં તો ઢગલે ઢગલા લાગણીઓ ભરી પડી છે!'

- હર્ષદ પંડ્યા ‘શબ્દપ્રીત’

હમણાં એક ખાનગી ટીવી ચેનલે કૉલેજ ખૂલ્યાના પહેલા જ દિવસે કેટલાંક છોકરા-છોકરીઓનો ઇન્ટરવ્યૂ કર્યો.

‘આજે કૉલેજ ખૂલી, અહીં કૉલેજમાં આપને પહેલા દિવસે કેવું લાગે છે?’ એક મહિલા રિપોર્ટરે કૉલેજિયન છોકરાને પૂછ્યું, ‘આપનો પ્રતિભાવ આપશો?’

‘કૉલેજ ભલે આજે ખૂલી,’ પેલા કૉલેજિયન છોકરાએ કહ્યું, ‘હું તો વૅકેશનમાંય દ૨૨ોજ અહીં આવતો અને આ ઝાડ નીચે બેસતો.’

‘તમે વૅકેશનમાંય કૉલેજ આવતા?!'

“હા જી, જે કૉલેજે મને ‘પ્રેમ પદારથ’ આપ્યો અને જેણે મારા જીવનમાં એક નવો જ વળાંક લાવીને એક નવા અધ્યાયનો આરંભ કરવાનું શુભકાર્ય કર્યું હોય,” કૉલેજિયન યુવાને કૉલેજના બિલ્ડિંગને પગે લાગતાં ઉમેર્યું, ‘એ કૉલેજને હું તો મંદિર કરતાં પણ વધારે મહત્ત્વની માનું છું.’

‘તમારા કહેવાનો મતલબ હું સમજી નહીં.’

‘એનો અર્થ એ થયો કે તમે કૉલેજનો અનુભવ લીધો નથી.’

‘અરે હોય કંઈ!’ મહિલા રિપોર્ટરે સહેજ આંચકો અનુભવીને કહ્યું, ‘હું ડબલ ગ્રેજ્યુએટ છું!’

‘માની લીધું કે તમે ડબલ ગ્રેજ્યુએટ હશો જ, પણ હું શિક્ષણની વાત નથી કરતો બહેન, હું તો અનુભવની વાત કરું છું. કૉલેજમાં જઈને શિક્ષણ લેવું એ એક વાત છે અને અનુભવ લેવો એ બીજી વાત છે અને લેવા જેવો અનુભવ લેવો એ ત્રીજી વાત છે.’

‘તમારું કેટલામું વર્ષ છે?’ મહિલા રિપોર્ટરે પૂછ્યું.

‘૨૮ વર્ષ, અત્યારે મારું ૨૮મું વર્ષ ચાલે છે.'

‘ઓહ, માફ કરજો. હું તમારી ઉંમર નથી પૂછતી, આ કૉલેજમાં તમે કયા વર્ષમાં છો?’

‘અભ્યાસની દૃષ્ટિએ જોઈએ તો ત્રીજું વર્ષ છે, હું ટી.વાય.માં છું, પણ ઉંમરની અને જિંદગીની દૃષ્ટિએ જોઈએ તો ૨૮ વર્ષમાં છેલ્લા નવેક વર્ષથી હું આ જ કૉલેજમાં છું.’

‘નવ.. વર્ષથી! આ જ કૉલેજમાં?!'

“ઓહ યેસ્સ! કૉલેજ માટેનું મારું આ કમિટમૅન્ટ છે. દરેક વર્ષમાં મેં નાપાસ થવાની હેટ્રિક કરી છે. મૂળ તો હું ક્રિકેટનો માણસ, પણ ઓળખાણના અભાવે ક્રિકેટર બની શક્યો નહીં, એટલે આ રીતે પણ ‘હેટ્રિક’ કરવાની હેબિટ મેં જાળવી રાખી છે.’’