ભાવ વધારાની જવાબદારીમાંથી કેન્દ્ર સરકાર છટકી શકે નહીં

અનાજ, કઠોળ, લોટ, દહીં જેવી વસ્તુઓના પેકિંગમાં વેચાણ પર પાંચ ટકા જીએસટી અમલમાં મુકીને સરકારે મધ્યમ અને ગરીબ વર્ગ પર આકરો પ્રહાર કર્યો છે

આખરે પહેલી ઑગસ્ટે લોકસભામાં મોંઘવારી અને ભાવ વધારા વિશે ચર્ચા શક્ય બની. કોંગ્રેસ સહિતના વિપક્ષી સભ્યોએ આ મુદ્દે સરકારને ઘેરવાનો પુરો પ્રયાસ કર્યો. કોંગ્રેસના મનીષ તિવારી સહિતના સભ્યોએ સરકારને ભીંસમાં લેવા માટે આંકડાકીય માહિતીનો ઉપયોગ કર્યો તેમ નાણાપ્રધાન નિર્મલા સીતારામને પણ સરકારનો બચાવ કરવા અને ભારતીય અર્થતંત્રની સ્થિતિ પ્રમાણમાં ઘણી સારી છે એવું દર્શાવવા આંકડાકીય ડેટાનો ઉપયોગ કર્યો. આખરે પુરવાર તો એ થયું કે આંકડાની માયાજાળ દ્વારા બધું પુરવાર કરી શકાય છે. ભારતીય અર્થતંત્ર સુદૃઢ સ્થિતિમાં છે અને તે મંદીની અસરમાં અટવાય તેવી શક્યતા નથી તેમ જ ભારતની હાલત શ્રીલંકા જેવી થવાની પણ દૂર દૂર સુધી કોઈ શક્યતા નથી એ વાત બેશક સાચી છે. ફોરેક્સ રિઝર્વની બાબતમાં પણ ભારત સધ્ધર સ્થિતિમાં છે. ડૉલર સામે રૂપિયો નબળો પડ્યો હોવા છતાં અન્ય રાષ્ટ્રોના ચલણની સરખામણીમાં રૂપિયો મજબૂત થયો છે એ પણ સ્વીકારવું પડે એવી હકીકત છે.