અંબાજીથી૭૦૦૦ કરોડના વિકાસપ્રકલ્પોનું ખાતમુહૂર્ત અને લોકાર્પણ કરતા વડાપ્રધાન નરેન્દ્ર મોદી

‘અંત્યોદયથી સર્વોદય’ના કલ્યાણનો વિચાર મૂર્તિમંત કરવા માટે રાજ્યની ડબલ એન્જિન સરકાર સતત સક્રિય

મા શક્તિની ધરા અંબાજી ધામમાં તાજેતરમાં વિકાસકાર્યોની સરવાણી વહી હતી અને વડાપ્રધાન શ્રી નરેન્દ્રભાઈ મોદીએ શક્તિપીઠ અંબાજીની ધરા પરથી અવિરત વિકાસકાર્યોની ધજા લહેરાવી હતી. પીએમશ્રી મોદીએ કેન્દ્ર સરકારના રૂ.૪૭૩૧ કરોડ તેમજ રાજ્ય સરકારના રૂ.૨૧૭૭ કરોડ મળી કુલ રૂ.૬૯૦૯ કરોડના વિવિધ પ્રકલ્પોના ખાતમુહૂર્ત અને લોકાર્પણ કરીને રાજ્યના નાગરિકો ઉપર વિકાસકાર્યોની હેલી વરસાવી હતી, જેમાં જનસુવિધાલક્ષી મહત્ત્વપૂર્ણ પ્રોજેક્ટ એવા તારંગા હિલ-અંબાજી-આબુ રેલવે લાઇનનું ખાતમુહૂર્ત તેમજ ૮૬૩૩ આવાસોનું ખાતમુહૂર્ત અને ૫૩૧૭૨ આવાસોના લોકાર્પણનો પણ સમાવેશ થાય છે.

બનાસકાંઠા જિલ્લાની બદલાયેલી તસવીર અંગે વડાપ્રધાનશ્રીએ જણાવ્યું હતું કે, છેલ્લા બે દાયકાના સતત પ્રયાસોને કારણે બનાસકાંઠા જિલ્લો વિકસિત બનવા તરફ આગળ વધી રહ્યો છે. આ પરિસ્થિતિ બદલવામાં નર્મદાના નીર, સુજલામ-સુફલામ અને ટપક સિંચાઈએ મોટી ભૂમિકા ભજવી છે. એટલું જ નહિ, આગામી સમયમાં ધરોઈ ડેમથી લઈ અંબાજી સુધીનો સમગ્ર બેલ્ટ વિકસિત કરવાનો સરકારે સંકલ્પ કર્યો છે. વડાપ્રધાનશ્રીએ કહ્યું હતું કે આવનારા દિવસોમાં અંબાજી આવતા પ્રવાસીઓએ અહીં બે-ત્રણ દિવસ રોકાવું પડે તેટલાં વિકાસકાર્યો હાથ ધર્યા છે. તો બીજી તરફ અંબાજી આવતા દર્શનાર્થીઓ-પર્યટકોએ સ્ટેચ્યૂ ઑફ યુનિટીની જેમ આ પંથકમાં ફરવું પડે તેવો આ યાત્રાધામનો વિકાસ કરવાની પ્રતિબદ્ધતા દર્શાવી હતી. તે ઉપરાંત આગામી સમયમાં અહીં વિશેષ કિસાન રેલ પણ ચાલશે તેવો વિશ્વાસ તેમણે વ્યક્ત કર્યો હતો.