સીમા હૈદરની પ્રેમકથા કેવો વળાંક લેશે?

સીમા હૈદર ઉપરાંત સિંચન મીણા અને તેના પિતા નેત્રપાલને પણ અટકાયતમાં લેવામાં આવ્યા

ચાર સંતાનો સાથે પાકિસ્તાનથી આવેલી સીમા હૈદરના પ્રકરણમાં નવો વળાંક આવ્યો છે. ગ્રેટર નોઇડાના યુવાન સિંચન મીણા સાથેના પ્રેમને બહાને ભારત આવેલી સીમા ઉપર પાકિસ્તાની જાસૂસ હોવાની શંકા છે. ઇન્ટેલિજન્સ બ્યુરો દ્વારા અપાયેલા રિપોર્ટના આધારે ઉત્તર પ્રદેશ એટીએસે સીમાની અટકાયત કરી છે. એટીએસના નોઇડા એકમે સીમાની પૂછપરછ શરૂ કરી છે. સીમા હૈદર ઉપરાંત સિંચન મીણા અને તેના પિતા નેત્રપાલને પણ અટકાયતમાં લેવામાં આવ્યા છે. ત્રણેય વ્યક્તિની અલગ-અલગ સ્થળે પૂછપરછ થઈ છે. રપુરામાં પહોંચેલી પોલીસ અને ઍન્ટિ ટૅરરિસ્ટ સ્કવૉડની ટીમે પહેલાં ગલીની બંને તરફના રસ્તા બંધ કર્યા. ત્યાર બાદ સીમાને બહાર કાઢીને લઈ ગયા. ઘરના લોકો દરવાજા બંધ કરીને બેઠા હતા. સીમા ઉપર આઇએસઆઇની એજન્ટ હોવાની શંકા છે. છેલ્લા કેટલાક દિવસોથી ગુપ્તચર એજન્સીઓ સીમા હૈદર વિશે માહિતી એકત્ર કરતી હતી. હવે એ બધા મુદ્દાઓ અંગે પૂછપરછ ચાલી રહી છે. જાણવા મળ્યું છે કે સીમાનો ભાઈ પાકિસ્તાની સૈનિક છે. તેના ચાચા પણ સૂબેદાર છે. પૂછપરછના અંતે સીમાની ધરપકડ થવાની શક્યતા છે.