પ્રવાસન

સાયલન્ટ વેલી નેશનલ પાર્ક, ઇન્ડિયાનું એમેઝોન

- રક્ષા ભટ્ટ

જ્યારે જ્યારે ભારતનાં જોવાલાયક ઉત્તમ પ્રવાસન સ્થળો પર નજર ફેરવવાનું મન થાય છે ત્યારે ભારતનાં પ્રાચીન મંદિરો, તેની આસપાસ રહેલી કોઈ પવિત્ર નદી અને નદીકાંઠે વિકસેલી સંસ્કૃતિ, સભ્યતા, વંશ અને વારસા પર કૅમેરાનો લેન્સ સ્થિર થઈ જાય છે, પરંતુ ભારતનું પ્રવાસન એટલે માત્ર પ્રાચીન તીર્થસ્થાનો કે મંદિરો જ નહીં, પરંતુ ભારતમાં તો કાંગરા, નુબ્રા અને સાયલન્ટ વેલી જેવી બીજી બાર-તેર વેલીઝ પણ છે, જે તેની દર્શનીય સુંદરતા, લખલૂટ પ્રાકૃતિક વૈભવ, વનસ્પતિ અને પ્રાણીસૃષ્ટિથી સમૃદ્ધ છે.

આવી સમૃદ્ધિમાં વળી આ આવેલા વર્લ્ડ ફેમસ નેશનલ પાર્ક સોનામાં સુગંધ ભળ્યા જેવો ઉમેરો કરે છે અને આપણને થાય છે કે જીવતેજીવ એકવાર તો અહીં જવું જ પડશે.

 જીવતેજીવ એક આંટો તો મારવો જ પડે તેવી મસ્ટ વિઝિટની યાદીની હકદાર ભારતની કેટલીક અનન્ય ખીણો અને બાયોડાઇવર્સિટીના બાદશાહ જેવા કેટલાક નેશનલ પાર્કમાં કેરલની સાયલન્ટ વેલી અને તે જ નામનો સાયલન્ટ વેલીનેશનલ પાર્કને પૂર્ણ આયોજનથી એક્સ્પ્લોર કરવા જેવો નેશનલ પાર્ક છે, કારણ કે આ તો આપણા ભારતનું જાણે એમેઝોનનું ઘટાટોપ જંગલ છે, જે જૈવિ વિવિધતાનો જીવંત ખજાનો લઈને સદીઓથી અસંખ્ય જીવસૃષ્ટિને પોતાના લીલાછમ ખોળામાં જીવની જેમ સાચવી રહ્યું છે અને તેની અનટેઇન્ડવાઇલ્ડરનેસની વાર્તાઓ પણ કહી રહ્યું છે.

ભારતની સાંસ્કૃતિક પરંપરાઓ સાચવીને બેઠેલા કેરલમાં સ્થિત આ સાયલન્ટ વેલી વેસ્ટર્ન ઘાટની નીલગિરિની ટેકરીઓમાં આવેલી છે. લંબચોરસ આકારની આ વેલી ઉત્તરથી દક્ષિણે બાર કિલોમીટરના લાંબા પટ્ટે અને પૂર્વથી પશ્ચિમે સાત કિલોમીટરના વિસ્તારમાં પથરાયેલી એવી વેલી છે, જે ખરા અર્થમાં સાયલન્ટ છે અને ખાસ્સી અનડિસ્ટર્બ પણ છે.

‘ગોડ્ઝ ઓન કન્ટ્રી’ની ટૅગલાઇનથી જાણીતા કેરલ રાજ્યના પલક્કડ જિલ્લામાં સ્થિત આ વેલી અને આ નેશનલ પાર્ક ૨૩૭.૫ સ્ક્વેર કિલોમીટરમાં પથરાયેલો વિશ્વના મૂલ્યવાન બાયો હોટ સ્પોર્ટ્સમાંનો એક છે, જે ૮૯.૫૪ સ્ક્વેર કિલોમીટરનો કોર એરિયા ધરાવે છે.