કવર સ્ટોરી

સેક્સટૉર્શન અને એક્સટૉર્શન

સેક્સટૉર્શન શબ્દ સેક્સ અને એક્સટૉર્શન એ બે જૂના શબ્દોને જોડીને રચવામાં આવ્યો છે. એક્સટૉર્શનનો અર્થ છે, ધાકધમકી, બ્લૅકમેઇલિંગ દ્વારા પૈસા કે ચીજવસ્તુની વસૂલી કરવી. જ્યારે સત્તાધીશો, સરકારી બાબુઓ સેક્સની ફેવર મેળવી બદલામાં પરિમટો ઇસ્યુ કરે, પરવાના કે કોન્ટ્રાક્ટ આપે, પૅમેન્ટ પાસ કરે અથવા શિક્ષકો સેક્સના બદલામાં માર્ક્સ વધારી આપે અથવા નિર્માતા, નિર્દેશક ફિલ્મમાં કામ આપે વગેરે સેક્સટૉર્શનના પ્રકાર છે, પરંતુ હમણાંના સમયમાં ઇન્ટરનેટનો વ્યાપ જગતભરમાં વધ્યો, મોબાઇલ કૅમેરાફોન સામાન્ય થઈ પડ્યા તેમ જ પૈસાની ચુકવણીની રીતો સામાન્ય અને સરળ બની ગઈ. તેથી એક નવા પ્રકારનું સેક્સટૉર્શન જગતભરમાં પ્રચલિત થયું છે. અગાઉ જે સેક્સટૉર્શન ચાલતું હતું અને હજી પણ ચાલે છે, તેમાં શારીરિક સંબંધ બાંધવાની છૂટ આપીને ફેવર કરાતી હતી અને હજી પણ થતી હશે. જ્યારે નવા પ્રકારના સેક્સટૉર્શનમાં જગતના દૂરના ખૂણેથી, વ્યક્તિગત સંપર્કમાં આવ્યા વગર, વ્યક્તિની સાચી કે ઊપજાવી (મોર્ફ) કાઢેલી ક્ષોભજનક નગ્ન તસવીરોને હથિયાર બનાવી, વ્યક્તિને વધુ શરમજનક હાલતમાં દુનિયા સમક્ષ રજૂ કરવાની ધમકી આપીને એની પાસેથી પૈસા પડાવવામાં આવે છે. વ્યક્તિની શરમ અને લજ્જાનો ફાયદો ઉઠાવવામાં આવે છે.

આ દૂષણ અંદરથી ખૂબ ફેલાઈ ચૂક્યું છે. એક તો લોકો શરમના માર્યા પોલીસ સ્ટેશનમાં ફરિયાદ કરવા જતાં નથી. જાય તો પણ એમનો કેસ જાહેરમાં પ્રગટ ન થાય તેની ખાસ કાળજી લે છે.

સેક્સટૉર્શન બ્લેકમેઇલરો (સ્કેમર્સ) કિશોરો અને નવયુવાનોને ખાસ નિશાન બનાવે છે, કારણ કે તેઓની માનસિક અને સામાજિક સ્થિતિઓ એવી હોય છે, જેમાં તેઓને નિશાન બનાવવાનું આસાન હોય છે. એમ તો તેઓ યુવાનો અને બુઝુર્ગોને પણ નિશાન બનાવે છે, પણ મોટી ઉંમરના લોકો અનુભવી અને માહિતગાર હોવાથી જલ્દીથી પકડમાં આવતા નથી.