વિઝા વિમર્શ,

ફેમિલી બેઝ્ડ પિટિશનની કેટેગરીમાં ફેરફાર થાય ત્યારે...

- ડો.સુધીર શાહ

અમેરિકાના વિઝાના બે પ્રકાર છે. જેમને અમેરિકામાં કાયમ રહેવું ન હોય, ફક્ત થોડા સમય માટે, કોઈ ખાસ કારણસર અમેરિકામાં જવું હોય એમના માટે જુદા-જુદા પ્રકારના ‘નોન-ઇમિગ્રન્ટ' વિઝા છે અને જેમને અમેરિકામાં કાયમ રહેવા જવું હોય, ત્યાંનું ગ્રીનકાર્ડ મેળવવું હોય, એ મેળવ્યા બાદ જો અમેરિકાના સિટીઝન બનવું હોય તો એમને ‘ઇમિગ્રન્ટ’ વિઝા મેળવવાના રહે છે.

ઇમિગ્રન્ટ વિઝા જુદી-જુદી રીતે પ્રાપ્ત થઈ શકે છે. જો તમારા પુખ્ત વયનાં સંતાનો અમેરિકન સિટીઝન હોય તો તેઓ તમારા લાભ માટે ઇમિગ્રન્ટ વિઝાની પિટિશન ઇમિજિયેટ રિલેટિવ કૅટેગરી હેઠળ દાખલ કરી શકે છે. જો તમે અમેરિકન સિટીઝન જોડે લગ્ન કરો તો તેઓ પણ તમને ઇમિજિયેટ રિલેટિવ કૅટેગરી હેઠળ ઇમિગ્રન્ટ વિઝા માટે સ્પોન્સર કરી શકે છે.

ચાર જુદી-જુદી ફૅમિલી પ્રેફરન્સ કૅટેગરીઓ છે, એની હેઠળ પણ ઇમિગ્રન્ટ વિઝા પ્રાપ્ત કરી શકાય છે. ફર્સ્ટ પ્રેફરન્સ કૅટેગરી હેઠળ અમેરિકન સિટીઝનો એમનાં અપરિણીત દીકરા યા દીકરીઓ માટે ઇમિગ્રન્ટ વિઝાની પિટિશન દાખલ કરી શકે છે.

સેકન્ડ પ્રેફરન્સ ફૅમિલી સ્પોન્સર કૅટેગરીના બે વિભાગો છેઃ ‘ટુ-એ’ અને ‘ટુ-બી’. સેકન્ડ પ્રેફરન્સ ટુ-એ કૅટેગરી હેઠળ અમેરિકાના ગ્રીનકાર્ડધારકો એમની પરદેશી પત્ની યા પતિ માટે તેમ જ એમના એકવીસ વર્ષથી નીચેની ઉંમરનાં બાળકો માટે ગ્રીનકાર્ડની પિટિશન દાખલ કરી શકે છે અને જો બાળકો એકવીસથી વધુ ઉંમરના થઈ જાય, પણ અવિવાહિત હોય તો એમના લાભ માટે સેકન્ડ ટુ-બી ગ્રીનકાર્ડની પિટિશન દાખલ કરી શકે છે.