એક ટંક ખાઈને ચલાવીએ છીએ ઢાકામાં રહેતી એક હિન્દુ મહિલાનો આર્તનાદ

બાંગ્લાદેશના રાજકીય અગનજાળની અસર માત્ર તેની સંસદ સુધી નથી રહી. એ આગ સામાન્ય પરિવારોને પણ દઝાડી રહી છે. હિન્દુ લઘુમતી સોફટ ટાર્ગેટ છે. ઘર-દુકાન સળગાવી દેવાય છે. મંદિરોમાં ભાંગફોડ કરાય છે

પાંચમી ઑગસ્ટ, શેખ હસીનાના તખ્તાપલટ અને પલાયન પછીના ત્રીજા દિવસે સાતમી ઑગસ્ટે ઢાકામાં રહેતી એક હિન્દુ મહિલાએ આપવીતી લખી છે. બાંગ્લાદેશમાં લઘુમતી હિન્દુ સમુદાયની સ્થિતિ કેવી કરુણ અને દારુણ હતી, તેની વાસ્તવિક ઝલક તેમાં નિહાળી શકાય છે.

હું અને ઘરના અન્ય કોઈ સભ્ય છેલ્લા એક સપ્તાહથી બહાર નીકળ્યાં નથી. રસોડામાં ચીજવસ્તુઓ ખતમ થઈ ગઈ છે. ચોખામાં મીઠું નાખી ભાત રાંધીને મોડી બપોરે ખાઈએ છીએ, જેથી રાત્રે ભૂખ ન લાગે. રાત્રે ચોકી કરીએ છીએ. પહેલાં પુરુષો જાગતા હતા. હવે અમે પણ વારા કાઢીએ છીએ. મારી દીકરી તમારા દેશમાં (ભારતમાં) છે, સિલીગુડીમાં. ફોન પર રડે છે, પરંતુ અમને નિરાંત છે કે કદાચ એ નિરાધાર થઈ જાય તો પણ એ જીવિત તો રહેશે.

બાંગ્લાદેશના રાજકીય અગનજાળની અસર માત્ર તેની સંસદ સુધી નથી રહી. એ આગ સામાન્ય પરિવારોને પણ દઝાડી રહી છે. હિન્દુ લઘુમતી સોફટ ટાર્ગેટ છે. ઘર-દુકાન સળગાવી દેવાય છે. મંદિરોમાં ભાંગફોડ કરાય છે. જ્યાં હિન્દુઓ રહે છે ત્યાં ટોળાંમાં લોકો આવીને હુમલા કરે છે. ૨૭ જિલ્લાઓમાં હિન્દુઓ આ બધું સહન કરી રહ્યા છે. સૌથી વધુ ખરાબ હાલત સ્ત્રીઓની છે.

મૌસમી નામની મહિલા કહે છે કે, જેને પોતાનું વતન માનીને ઉછેર કર્યો ત્યાં અમોને લૂંટવામાં આવી રહ્યા છે. જ્યાં મારું પિયર છે એ નોઆખલીમાં લૂંટફાટ પછી અનેક ઘર-પરિવારોમાંથી યુવતીઓ લાપતા છે.