ખરો સંઘર્ષ રંગ લગાવવામાં નહીં, જામેલા રંગ દૂર કરવામાં થતો હોય છે

હોળીના રંગ દૂર કરવાના આસાન ઘરગથ્થુ ઉપાયો

- હેતલ ભટ્ટ

રંગોનો તહેવાર હોળી, જોકે રંગોની મજા ત્યાં સુધી જ સારી લાગતી હોય છે જ્યાં સુધી એ હવામાં ઊડતા રહે. જો એ રંગ ત્વચા પર જામી જાય તો મજા સજા બની જતી હોય છે. હોળી-ધુળેટીના તહેવારનો ખરો સંઘર્ષ રંગ લગાવવામાં નહીં, પરંતુ લાગેલો રંગ ઉતારવામાં થતો હોય છે. પહેલાંના સમયમાં પ્રાકૃતિક રંગોથી હોળી રમવામાં આવતી. કેસૂડાંનાં ફૂલનું પાણી, વનસ્પતિમાંથી બનાવેલા રંગ, ફૂલોમાંથી બનાવેલા રંગનો ઉપયોગ કરવામાં આવતો. ગુલાલથી હોળી રમવામાં આવતી, પરંતુ હવે રસાયણોનો ઉપયોગ કરીને રંગ બનાવવામાં આવે છે અને આ રંગ ત્વચા, વાળ, આંખ જેવાં અંગો માટે જોખમી સાબિત થતાં હોય છે. કેટલીકવાર ત્વચા અને વાળમાં રંગ જામી જતો હોય છે તો કેટલીકવાર કપડાં પર રંગના ડાઘા પડી જતા હોય છે. હોળીના રંગ ત્વચા અને માથામાં રહેલા એસિડ અને ક્ષારનું સંતુલન બગાડી દે છે. તેના કારણે ત્વચાની એલર્જીસ, ખંજવાળ આવવી, ચાઠાં પડી જવાં, ત્વચા પર લાલાશ ઊપસી આવવી વગેરે સમસ્યાઓ ઉદ્ભવતી હોય છે. આ ઉપરાંત કેટલીકવાર ખીલ અને ફોલ્લીઓ પણ ઊપસી આવતી હોય છે. ત્વચામાં ડ્રાયનેસ જોવા મળે છે. ત્વચા પર સફેદ પરત જામે છે અને આ પરત સાથે ત્વચા ઉખડતી જોવા મળે છે. ત્વચાની સાથે વાળ રંગ પ્રત્યે સંવેદનશીલ બની જતા હોય છે. જો વાળને રંગ અનુકૂળ ન આવે તો વાળ સૂકા થઈ જાય છે અને ખંજવાળ આવવા લાગે છે. આવા જિદ્દી અને જોખમી રંગોથી ત્વચાનું રક્ષણ કરવા માટે ત્વચાના પ્રકાર પર ધ્યાન આપવું જરૂરી બની જાય છે.