લંકાની આગ ઝટ ઠરવાની નથી..

પ્રજાના વિરોધે શ્રીલંકાના પ્રમુખ અને વડા પ્રધાનને સત્તા છોડવાની ફરજ પાડી, પણ આપણો પડોશી દેશ અત્યારે એવી કંગાળ અવસ્થામાં છે કે એમાંથી બહાર આવવામાં નવી સરકારને નવ નેજાં પાણી ઊતરશે.

- હીરેન મહેતા

રોજેરોજ પાતળી થઈ રહેલી આર્થિક સ્થિતિને કારણે ઉશ્કેરાયેલા લોકોએ લંકન વડા પ્રધાનનું ઘર જ સળગાવી દીધું.

શ્રીલંકાની કટોકટી દૂર થવાનું નામ લેતી નથી. માથે અબજો રૂપિયાનું દેવું છે એટલે આર્થિક આફત તો મોટી છે જ, હવે રાષ્ટ્રપતિ અને વડા પ્રધાન જેવા બે મહત્ત્વના હોદ્દા કામચલાઉ ધોરણે ખાલી પડ્યા હોવાથી ત્યાં રાજકીય શૂન્યાવકાશ પણ સર્જાયો છે. જો કે દેશની આર્થિક અવદશા પાછળ રાજકીય નેતાગીરી જ જવાબદાર હોવાથી વધુ દયા શ્રીલંકાના ખાડે ગયેલા અર્થતંત્રની ખાવા જેવી છે.

ભારત અને શ્રીલંકા વચ્ચે સદીઓથી વ્યવહાર ચાલે છે. વર્ષો સુધી બન્ને બ્રિટિશ શાસન હેઠળ રહ્યા હોવાથી એ સગપણ પણ ખરું. વરસેકના ગાળામાં જ બન્ને આઝાદ થયા એ પછી પણ સારાસારીનો સંબંધ જળવાઈ રહ્યો. જો કે ૧૯૭૦-૮૦ના દાયકામાં લંકામાં વસેલા તમિળ મૂળના લોકોએ સ્થાનિક સિંહાલી બહુમતી સરકાર સામે સશસ્ત્ર આંદોલન કર્યું અને ભારતની તત્કાલીન નેતાગીરીએ એ બળવાને મદદ કરવા માંડી ત્યારથી બન્ને દેશ વચ્ચે અંતર ઊભું થયું અને પછી તો એ ખાઈ પહોળી થતી ગઈ. યોગાનુયોગ એ અરસામાં ચીન વિસ્તારવાદને ચાળે ચડ્યું અને ભારતવિરોધી લાગ એણે બરાબર પડખામાં લીધું.