બર્ફાની બાબાનાં દર્શનમાં દર વર્ષે વિઘ્ન શા માટે?

અમરનાથયાત્રા દરેક હિંદુની ઘણી મોટી ઈચ્છા હોય. શરીર સ્વસ્થ હોય, થોડી હાલાકી સહન કરવાની તૈયારી હોય ત્યારે યાત્રા થઈ જાય તો સારું એવું ભાવિકો ઈચ્છે અને દર વર્ષે સેંકડો લોકો હિમાલયની વાદીઓમાં જમ્મુ-કશ્મીરના પહેલગામ પાસે આવેલી અમરનાથ ગુફામાં સર્જાતા બરફના શિવલિંગનાં દર્શન માટે ઊમળકાભેર જાય છે, પરંતુ ક્યારેક આતંકવાદીઓ યાત્રાળુઓનો રસ્તો રોકે છે તો ક્યારેક કુદરત કહેર વરસાવે છે. શા માટે આવા અવરોધ?

- નિતુલ ગજ્જર (વડોદરા)

વાદળ ફાટવા સાથે આસપાસના પર્વત પરથી વહી આવેલું પાણી અમરનાથ ગુફા નજીકથી અનેક યાત્રીઓને ખેંચી ગયું. કલાકોની જહેમત પછી અમુક મૃતદેહ હાથ લાગ્યા.

ઈસુ કૅલેન્ડરના જૂન-જુલાઈ અને વિક્રમ સંવતનો અષાઢ મહિનો શરૂ થાય ત્યારથી આવા સમાચાર વર્તમાનપત્રો કે ચૅનલમાં દેખાય. બર્ફાની બાબા તરીકે પ્રખ્યાત હિમાલયની શ્વેત કંદરાની વચ્ચે આવેલા અમરનાથ મહાદેવની મુશ્કેલ છતાં માહાત્મ્યભરી યાત્રા દર વર્ષે હોય. આતંકીઓ તો ત્રાટકે કે નહીં, પરંતુ હમણાં બે વર્ષ કોરોના ત્રાટક્યો ને યાત્રા બંધ રહી. આ વર્ષે ભાવિકો ઉત્સાહથી પહોંચ્યા બાબાના શરણે ત્યાં જ કુદરત વીફરી. કેદારનાથની વિભીષિકા હજી લોકોને વીસરાઈ નથી ત્યાં આ વર્ષે અમરનાથયાત્રાના રૂટ પર વાદળ ફાટ્યું અને જાનહાનિ સર્જાઈ એ દશ્યો તો આપણે ટીવી અને સોશિયલ મિડિયા પર જોયાં. ભલે કુદરતી આપદા પર આમ તો કોઈનું નિયંત્રણ હોતું નથી, છતાં આપણને એ સવાલ પણ થયા વગર ન રહે કે આ યાત્રામાં સતત વિઘ્ન કેમ આવ્યા કરે છે?

આવ્યા one આ વર્ષે પણ હજારો લોકોએ અમરનાથની યાત્રા માટે રજિસ્ટ્રેશન કરાવ્યું હતું, પરંતુ ગયા શુક્રવારે (૮ જુલાઈએ) અમરનાથમાં આભ ફાટ્યું અને પાણીના પ્રવાહમાં યાત્રાળુઓની અનેક છાવણી તણાઈ ગઈ. આ અતિવૃષ્ટિમાં ૧૬ લોકોએ પોતાનો જીવ ગુમાવ્યો અને ૪૦થી વધુ લોકોનો હજી પત્તો લાગ્યો નથી. અત્યાર સુધીમાં સૈન્ય દ્વારા અમરનાથથી ૧૬,૦૦૦થી વધારે લોકોને રેસ્ક્યુ કરી સલામત સ્થળે ખસેડવામાં આવ્યા છે.