યહ પેમેન્ટ મુઝે દે દે સરકાર

નગરપાલિકા કે સરકારી વિભાગના અધિકારીઓ ઘણી વાર કૉન્ટ્રાક્ટર કે બીજા લાભાર્થીને એમના હક માટે ટટળાવતા હોવાની ફરિયાદ ઊઠે છે. એવા મામલામાં કોર્ટ વચ્ચે પડે અને સરકારી વિભાગ વિરુદ્ધ ફેંસલો આપે તો નીચાજોણું સરકારનું થાય. આવા કેટલાક ચોંકાવનારા કિસ્સા હમણાં ગુજરાતમાં બન્યા, જેમાં સરકારી કચેરીની સંપત્તિ જપ્ત કરવામાં આવી છે.

- મહેશ શાહ (અમદાવાદ)

બુંદ કી બિગડી, હોજ સે નહી સુધરતી.. એવી એક પ્રચલિત ઉક્તિ છે. કંઈક એવો ઘાટ હમણાં ગુજરાતની ખેડા નગરપાલિકામાં થયો. ગુજરાતમાં સંભવતઃ પ્રથમ વાર આવું બન્યું.

એનાં મૂળ જો કે થોડાં વર્ષ પહેલાં નખાયાં હતાં. થયું'તું એવું કે ખેડા પાલિકાએ નગરજનોને મિનરલ વૉટર આપવા માટે વૉટર સરફેસિંગનું ટેન્ડર બહાર પાડ્યું. એમાં અમદાવાદની એક કંપની (કૉન્ટ્રાક્ટર)નું વર્ષ ૨૦૦૯માં ટેન્ડર પાસ થયું. એ માટે કૉન્ટ્રાક્ટરે મોટી રકમની ડિપોઝિટ મૂકી. પછી કામ શરૂ થયું, પરંતુ નવેક વર્ષ પહેલાં એક સરકારી નિર્ણયને પગલે કામ બંધ કરી દેવામાં આવ્યું.

એથી કૉન્ટ્રાક્ટરે ડિપોઝિટના અંદાજે ૩૩ લાખ રૂપિયા ખેડા પાલિકા પાસે પરત માગ્યા, પણ પાલિકાએ ન આપ્યા. ઉચ્ચ અધિકારીઓને કરવામાં આવેલી રજૂઆત પણ ફળદાયી ન નીવડી એટલે કૉન્ટ્રાક્ટરે ખેડા કોર્ટનો સહારો લીધો. તેમ છતાં પાલિકાએ ડિપોઝિટ પાછી ન આપી. વ્યાજ ઉમેરીને ૨કમ ૪૮ લાખ રૂપિયા સુધી પહોંચી. આખો વિવાદ છેવટે લવાદ સુધી પહોંચ્યો. તાજેતરમાં લવાદે કૉન્ટ્રાક્ટરને લેણી રકમની વસૂલાત માટે ખેડા પાલિકાની મિલકત જપ્ત કરવાનો આદેશ આપ્યો. સ્વાભાવિક રીતે જ પાલિકા અને સરકારમાં હડકંપ મચી ગયો.

લવાદનો આદેશ થયો કે કૉન્ટ્રાક્ટરના માણસો ખરેખર ખેડા પાલિકાની ઑફિસનો સામાન લઈ ગયા.

લવાદના આદેશ પછી કૉન્ટ્રાક્ટર તો ખેડા પાલિકાની ઑફિસમાંથી ટેબલ, ખુરસી, કબાટ, તિજોરી, સોફા, ઍરકન્ડિશનર, કમ્પ્યુટર, પ્રિન્ટર, પંખા, ટ્યૂબલાઈટ તથા જેસીબી, ટ્રૅક્ટર, જેટિંગ મશીન, વગેરે લઈ ગયા. કોઈ કૉન્ટ્રાક્ટરે લેણાંની વસૂલાત માટે લવાદના આદેશથી પાલિકાની સંપત્તિ જપ્ત કરી હોય એવી ગુજરાતની આ સંભવતઃ પ્રથમ ઘટના હશે. કહી શકાય કે પાલિકા નગરજનોને પાણી ન આપી શકી, પણ કૉન્ટ્રાક્ટરના પૈસા પાછા ચૂકવવામાં ખુદ પાણીમાં બેસી ગઈ અને પરિણામે એની આબરૂ પણ બગડી.

જપ્તીની આ ચોંકાવનારી ઘટના પછી પાલિકાના અધિકારીઓએ લાળા ચાવ્યા કે પાલિકા ખોટમાં ચાલે છે. અમે કૉન્ટ્રાક્ટરને બાકી રકમ હપ્તાથી પરત આપવાની તૈયારી બતાવેલી. કૉન્ટ્રાક્ટરે પાલિકામાંથી ફર્નિચર, જેસીબી, વગેરે જપ્ત કર્યાં એનું વૅલ્યુએશન ઓછું દર્શાવ્યું છે. ગામ અને ગરીબોની સંસ્થા એવી પાલિકાનું ખરાબ દેખાય એ માટે કૉન્ટ્રાક્ટરે પાલિકાની સંપત્તિ જપ્ત કરી, વગેરે.