કોઈ તમને ઉંદરભાઈ તરીકે બોલાવે તો? ...તો શું તમે આ રીતે બદલો લો ખરા?

સાપ ઘરમાં ફરતો દેખાવા માંડ્યો હશે એટલે એમણે આજે સવારે મને મળીને માફી માગી લીધી!

- રાજુ પટેલ

‘પણ બીજું કંઈ નહીં ને ઉંદર જ કેમ? તમારા એ પડોશી ઉત્તમભાઈને તમારા ઘરમાં ઉંદર છોડવાનો આઈડિયા કેમ આવ્યો હશે?’ મોતીવાલાએ નાગજીભાઈને પૂછ્યું.

‘મારી વાતથી કદાચ એમને ખોટું લાગ્યું હશે. એક વાર એમની સાથે ઝઘડતી વખતે મેં કહ્યું હતું કે તમારું નામ ઉત્તમભાઈ નહીં, પણ ઉંદરભાઈ હોવું જોઈતું હતું. આ ઉંદરની મોકાણ એ પછી જ શરૂ થઈ છે.’ નાગજીભાઈ બોલ્યા.

‘આવું કોઈને કહો એ બરાબર ન જ કહેવાય.’

‘પણ એ કરે છે જ ઉંદર જેવું. દરવાજો ખોલતાં ઘરમાં ઘૂસી જાય અને વાતો સાંભળે, જ્યાં-ત્યાં હાથ નાખે, પ્લેટમાં નાસ્તો પડ્યો હોય તો ખાઈ જાય.’

‘પણ ઉંદર? કોઈને ઉંદર ન કહેવું જોઈએ.’

‘જે થઈ ગયું એ થઈ ગયું, પણ હવે જે થઈ રહ્યું એ સહન થાય એવું નથી.’ નાગજીભાઈએ કહ્યું.

નાગજીભાઈનો કેસ એવો હતો કે એમને રોજનું નુકસાન થઈ રહ્યું હતું. નુકસાન કોણ કરાવે છે એ રહસ્ય નહોતું, પણ નુકસાન કઈ રીતે રોકવું એય સમજાતું નહોતું. નાગજીભાઈનું જરીનું બહુ મોટા પાયે કામકાજ હતું. રેડીમેડ કપડાં અને સાડી પર જરીકામ કરવાનો કૉન્ટ્રાક્ટ લઈને કારીગરોને આપી દેતા. કારીગરો જરીકામ કરે એ પછી નાગજીભાઈનાં પત્ની એક-એક ડ્રેસ ચેક કરી લેતાં. બે મહિનાથી નાગજીભાઈનાં પત્નીને ઘૂંટણમાં દુખાવો રહેતો હોવાથી કપડાંના ચેકિંગ માટે બધો માલ ઘરે આવતો.

ઘરમાં આમ વેચાણ માટેનો માલ પડ્યો હોય એમાં ઉંદર મોં મારે તો દેખીતું છે કે ઘણું નુકસાન થાય. શરૂઆતમાં તો નાગજીભાઈને સમજાયું નહીં કે આ કોઈનું ષડ્યુંત્ર છે. ઉંદર પકડવાના પાંજરાની મદદથી એમણે ઉંદર પકડ્યો અને દૂર છોડી મૂક્યો. બે દિવસ બાદ ફરી ઉંદર આવ્યો. ફરી પાંજરાની મદદથી છુટકારો મેળવ્યો, પણ જ્યારે ત્રીજી વાર ઉંદર આવ્યો ત્યારે નાગજીભાઈને શંકા ગઈ કે કોઈ ઈરાદાપૂર્વક ઉંદર એમના ઘરમાં છોડી રહ્યું છે.