નીતલ દેસાઈ: રેડિયોતરંગથી માતૃભાષા સાથે જાળવ્યો છે સંબંધ

આમ તો એ ટેક્સ્ટાઈલ એન્જિનિયર, પણ અમેરિકન કંપનીમાં ડેટા ઍનાલિસ્ટ તરીકે કામ કરતાં એ પહોંચ્યાં ઑસ્ટ્રેલિયન સરકારના રેડિયોમથકે. ત્યાં કમ્પ્યુટર સૉફ્ટવેરના ઉપયોગ માટે માનદ સેવા આપતાં આપતાં ચાનક ચડી બ્રોડકાસ્ટ જર્નલિસ્ટ બનવાની. મૂળ વડોદરાની આ વામા શું કરે છે અત્યારે ઑસ્ટ્રેલિયામાં?

- નીકિતા શાહ

એ ત્યાં ગયાં તો હતાં કોઈ સર્વેના કામસર. ઑસ્ટ્રેલિયન સરકારની રેડિયોસેવા એસબીએસ (સ્પેશિયલ બ્રોડકાસ્ટિંગ સર્વિસ) વતી જાણીતી અમેરિકન કંપની ગેલપ એ સર્વેનું કામ કરતી હતી. મૂળ વડોદરાનાં નીતલ દેસાઈ એ વખતે ગેલપમાં ડેટા ઍનાલિસ્ટ તરીકે કામ કરતાં હતાં. એ પહોંચ્યાં ઑસ્ટ્રેલિયાના આર્થિક પાટનગર સિડનીસ્થિત એસબીએસના કાર્યાલયે ઑડિયન્સ રિસર્ચના સર્વે માટે.

ત્યાં એમનો ભેટો થયો શશાંકભાઈ મહેતા સાથે. આપણા જાણીતા સાહિત્યકાર સિતાંશુ યશશ્ચંદ્ર મહેતાના એ મોટા ભાઈ. ઑસ્ટ્રેલિયામાં સ્થાયી થઈને શશાંકભાઈ એસબીએસ રેડિયો પરથી ગુજરાતીમાં કાર્યક્રમ આપતા. નીતલબહેન ત્યારે હજી નવાં નવાં સિડની રહેવા ગયાં હતાં. શશાંકભાઈએ નીતલ દેસાઈને એસબીએસ રેડિયોના ગુજરાતી કાર્યક્રમ માટે નવા કમ્પ્યુટર સૉફ્ટવેરના ઉપયોગ માટે મદદ કરવા પૂછી જોયું. એમણે તરત તૈયારી દર્શાવી અને એક વર્ષ એ કામ કર્યું.

પછી તો શશાંકભાઈએ એમને એસબીએસ રેડિયોના ગુજરાતી વિભાગમાં જોડાઈ જવાની ઑફર આપી. એ વાત વર્ષ ૨૦૦૧ની...

...આજે નીતલબહેન એસબીએસ રેડિયોના ગુજરાતી પ્રોગ્રામ વિભાગનાં વડા એટલે કે એક્ઝિક્યુટિવ પ્રોડ્યુસર છે! એક ટેક્સ્ટાઈલ એન્જિનિયર યુવતી ગુજરાતી રેડિયો વિભાગનું સંચાલન સંભાળે? એ પણ ઑસ્ટ્રેલિયન સરકાર હસ્તકની રેડિયો સર્વિસ? જાણીને નવાઈ લાગે, પરંતુ હા, માત્ર ૮૧,૦૦૦ ગુજરાતીભાષીઓની વસતિ ધરાવતા ઑસ્ટ્રેલિયામાં સરકારી રેડિયો પર દર અઠવાડિયે બે દિવસ ગુજરાતી કાર્યક્રમ આવે છે અને સિડની ઉપરાંત મેલબોર્નમાં એના સ્ટુડિયો પણ છે.

- અને હા, નીતલ દેસાઈએ મૂળ તો વડોદરાની મહારાજા સયાજીરાવ (એમ.એસ.) યુનિવર્સિટીમાંથી ટેક્સ્ટાઈલ એન્જિનિયરિંગનો અભ્યાસ કર્યો છે! એ પછી એમણે વડોદરાની જ એક મિલમાં વરસેક કામ પણ કર્યું અને બીજી બે કંપનીમાં નોકરી કરી. ત્યાર બાદ આવ્યાં લગ્ન-મુંબઈના એન્જિનિયર યુવાન મનીષ દેસાઈ સાથે. મનીષભાઈ એ વખતે સિંગાપોરની એક કંપની સાથે સંકળાયેલા હતા.